Расулуллоҳ соллаллоҳу алайҳи васалламнинг буйруқлари, кўрсатмаларига оғишмай амал қилиш икки дунё саодатига сазовор қилади. Зеро, бу ҳақда “Саботул ожизин”да шундай дейилади:
Пайғамбарнинг амрига қилсанг итоат,
Саодатдур, саодатдур, саодат…
Уқайл ибн Абу Толиб айтади: Расулуллоҳ соллаллоҳу алайҳи васаллам билан сафарда эдим, У зотда уч нарсани кўрдим. Шу уч нарса сабабли қалбимга Ислом маҳкам ўрнашди.
Биринчиси. Расулуллоҳ соллаллоҳу алайҳи васаллам қазои ҳожат қилмоқчи бўлдилар. Сал нарида бир неча дарахт бор эди. Менга: “Дарахтлар олдига бориб, сизларни Расулуллоҳ чақиряптилар, У кишини тўсиб турур экансизлар, деб айт”, дедилар. Мен бориб, гапимни тугатмасимдан, дарахтлар томирлари билан ердан ажралиб келиб, Расулуллоҳни ўраб турди. Фориғ бўлганларидан кейин дарахтлар ўринларига қайтиб кетди.
Иккинчиси. Мен қаттиқ чанқадим, лекин сув топа олмадим. Шунда Расулуллоҳ соллаллоҳу алайҳи васаллам: “Бу тоққа чиқиб менинг номимдан салом айт ва сувинг бўлса, менга бер, деб айт”, дедилар. Мен тоққа чиқиб, Расулуллоҳ соллаллоҳу алайҳи васаллам гапларини айта бошладим. Сўзимни тугатмасимдан тоғ одамга ўхшаб гапира кетди: “Сен Расулуллоҳга бориб айт, мен: “Эй имон келтирган зотлар! Ўзингизни ва аҳлингизни ёқилғиси одамлар ва тошлардан бўлган дўзахдан сақлангиз” (Таҳрим – 6), ояти нозил бўлгандан бери ўша тошлардан бўлиб қолишимдан қўрқиб, йиғлай-йиғлай сувим қолмаган”. Мен ҳайратлар ичида қайтиб келдим.
Учинчиси. Йўлда кетаётган эдим, тўсатдан бир туя Расулуллоҳ соллаллоҳу алайҳи васаллам олдиларига чопиб келиб: “Ё Расулуллоҳ, ёрдам беринг!” деди. Шу пайт унинг орқасидан бир аъробий қилич яланғочлаб келди. Расулуллоҳ соллаллоҳу алайҳи васаллам: “Бу бечорадан нима хоҳлайсан?” деб сўрадилар. У: “Ё Расулуллоҳ! Мен буни қимматга сотиб олганман. Энди у менга итоат қилмаяпти. Шунинг учун уни сўйиб, гўштидан фойдаланаман”, деди. Расулуллоҳ туяга қараб: “Нима учун унга итоат қилмаяпсан?” деб сўрадилар. Туя: “Мен унинг ёмон ишлари туфайли унга осий бўлмоқдаман, чунки унинг қабиласида хуфтонни ўқимай ухлашади. Агар у хуфтон ўқишга ваъда берса, мен ҳам унга осий бўлмасликка аҳд қиламан. Чунки улар орасида эканман, ҳаммамизга Аллоҳнинг азоби келишидан қўрқаман”, деди. Аъробий намозни тарк этмасликка аҳд қилди. Сўнгра туя у билан бирга қайтиб кетди.
Раҳматулло Жалилов
тайёрлади
