Аллоҳга шукурлар бўлсинки, улуғ байрамларимиздан бири бўлган Қурбон ҳайити яқинлашиб келмоқда. Худди шу лаҳзаларда бутун дунёдан Мадинаи Мунаввара ва Маккаи Мукаррамага ҳаж ибодатини адо қилиш учун миллионлаб мусулмонлар йиғилмоқдалар. Аллоҳ уларнинг бажарадиган ибодатларини осон ва барокатли қилсин!
Ушбу улуғ кунларни ўз юртида кутиб олаётган киши қандай амалларни бажариши ва нималардан сақланиши керак?
Зулҳижжа ойининг аввалги 10 куни ва ташриқ кунлари ниҳоятда фазилатлидир. Ушбу кунларда мусулмонлар бир-бирларига яхшиликлар қилишса, эҳсонлар беришса, бир-бирларининг ҳолларидан хабар олишса, жуда улкан савобларга эга бўладилар.
Бу ойда Аллоҳга ҳамд ва такбир айтишни кўпайтириш лозим. Закотга қодир кишилар закотларини муҳтож бўлган кишиларга беришлари лозим. Бунинг оқибатида кам таъминланган оилаларда ҳам хурсандчилик ва байрам шукуҳи пайдо бўлади.
Қурбон (Зулҳижжа) ойи кириши билан азадорлик ҳайит байрамига мутлақо тескари ва тўғри келмайдиган бидъат ишларга йўл қўйиб бўлмайди. “Даҳа” деб атаб олиб, ҳар куни эрта тонгдан уввос солиб йиғлаш шариатимизда қаттиқ қораланади. Буни имомларимиз ва отинойиларимиз ҳамда махалла оқсоқоллари халққа атрофлича тушунтиришлари лозим.
Ҳайит кунлари Макка шаҳрида ҳожилар муборак ҳаж амалларини бажараётган маҳалда, бу ерда кўчаларда стол-стуллар қилиб, фотиҳахонликлар ўтказишдан ҳали ҳануз қутила олмаётганлар бор. Яхшилаб қарасангиз, худди байрам бўлмаётгандек таассурот пайдо бўлади. Динимизда аза уч кундир, ундан кейин давом эттириш суннатга ҳилофдир.
Шунинг учун, ҳурматли биродарлар, опа-сингиллар, онахонлар муборак динимизнинг икки байрамидан бири бўлган Қурбон ҳайитини ўзига муносиб равишда, катта хурсандчилик ва шоду-хуррамлик билан, кўпдан-кўп савобларга эга бўлган холда кутиб олайлик. Зеро озод ва обод юртимизга ана шундай миллий байрамлар жуда ярашади.
Фурсатдан фойдаланиб, барча юртдошларимизни муборак Қурбон ҳайити билан чин дилдан муборакбод этамиз. Аллоҳ динимизга ривож, юртимизга тинчлик ва хотиржамлик неъматини қиёмат кунигача бардавом қилсин!
Толибжон ЭРГАШЕВ,
Бувайда тумани бош имом хатиби
