19.03.2020 йил санасида жойланди
Сир эмаски, айни пайтда коронавирус инфекцияси бутун дунё бўйлаб кенг тарқалмоқда. Мутахассислар ушбу касалликни юқтирмаслик, уни олдини олиш учун керакли тавсиларни бериб келмоқдалар. Ана шу тавсияларнинг негизи бир илдизга – покликка, тиббиёт тили билан айтганда гигиенага бориб тақалмоқда.
Биз бу мақолада шахсий гигиена, ҳар бир инсон ўзининг озода-поклиги билан бир қаторда эътибор қартиш керак бўлган, ҳатто бу масала дунё миқёсида долзарб масалага айланиб бораётган – атроф-муҳит тозалиги ёҳуд табиатни ифлослантирмаслик борасида сўз юритмоқчимиз.
Бугунги кунга келиб атроф-муҳитнинг ифлосланиши сезиларли даражада ортди. Шу сабаб давлатимиз тарафидан ҳам озодалик ва покликнинг ҳар бир фуқаро ҳаётидаги аҳамиятини орттириш мақсадида кенг миқёсда тарғибот-ташвиқот ишлари олиб борилмоқда. Боиси ҳар бир инсон атроф-муҳитни озода сақлаши учун биринчи навбатда ўзида озодалик-покликни акс эттирган бўлиши даркор.
Дарҳақиқат, инсон, унинг қалби пок бўлар экан, ҳеч қачон ўзгаларга, атроф-муҳитга зарар келтирмайди. Покликнинг фазилати унинг инсон ҳаётидаги аҳамияти борасида Пайғамбаримиз алайҳиссаломдан кўплаб ҳадислар ворид бўлган. Жумладан, кўп бора кўзимиз тушган ҳадис: “Поклик иймондандир”. Бу ҳадиси шарифдан поклик инсон иймонининг бир қисми ҳамда нақадар аҳамиятли эканини англашимиз мумкин. Буюк бобокалонимиз Aлишер Навоий ҳам ўзларининг “Aрбаъин” китобларида покликка алоҳида урғу бериб, бир ҳадиси шарифни шеърий ифодалаганлар:
Гар ҳамиша таҳоратинг бўлса,
Aриғай фоқа чирки ул сувдин,
Тоҳир ўл, истасанг фузун рўзий,
Хосир улким, итурди бу сўдин…
“Aгар доимо пок бўлсанг, қашшоқлик сендан арийди. Ризқинг мўл-кўл бўлишини истасанг, пок бўл. Озодаликка эътибор бермаган инсон ҳақиқий зиёндадир”.
Юқоридаги байтда ҳам покликнинг гўзал фазилатларини ва улкан фойдаларини кўришимиз мумкин.
Баҳор фасли кириб келар экан, уйғониш даври бўлган бу фаслда одамлар ҳам, ҳайвоноту набототлар ҳам ҳаракатга тушадилар. Шаҳарларда, маҳаллаларда кенг кўламда ҳашарлар ўтказилади. Ушбу ҳашарлардан кўзланган мақсад биринчи навбатда поклик бўлса, иккинчидан эса одамлар қалбларини бир-бирига улфат қилиш, бир-бирларига елкадош бўлиш каби инсоний сифатларни уйғотиш ҳамдир. Шу юртнинг бир аъзоси сифатида атроф-муҳитимиз озодалиги учун барчамиз мана шундай йиғинларда фаол қатнашмоғимиз мақсадга мувофиқ бўлади. Зеро, озода юрт доимо обод бўлур!
Адҳамжон ХОШИМОВ,
Қўштепа тумани “Султон Орифийн” масжиди имом-хатиби
