Она сути бола учун Аллоҳ томонидан берилган энг илоҳий неъматдир. У нафақат тўғри овқатланиш манбаи, балки чақалоқнинг соғлом ўсиши, иммунитети ва руҳий ривожланиши учун бебаҳо омил ҳисобланади. Тиббиёт олимлари бугунга қадар она сутига тенг келадиган тайёр озуқа йўқлигини таъкидлаб келади.
Мутахассисларнинг айтишича, она сути болани турли инфекция ва касалликлардан ҳимоя қиладиган антитаналарга бой. Айниқса, сутнинг илк қатлами — қаймоқ боланинг биринчи кунлардаги иммун қўрғони ҳисобланади. У болани ичак инфекцияси, пневмония, шамоллаш каби кўплаб хасталиклардан сақлайди.
Аниқланишича, она сути таркиби боланинг ёшига қараб ўзгариб туради. Унда белок, табиий ёғлар, витаминлар, минераллар, ферментлар боланинг организмига мутаносиб равишда мослашган ҳолатда бўлади. Шу боис она сути боланинг мия фаолияти, нерв тизими ва суяк тузилишининг тўғри ривожланишига катта ҳисса қўшади.
Эмизиш жараёни она ва бола ўртасидаги меҳр ришталарини мустаҳкамлайди. Бу болада ишонч ҳисси, хотиржамлик ва руҳий барқарорликни шакллантиради. Психологлар бу жараён чақалоқнинг кейинги ҳаётида ҳам ижобий таъсир кўрсатишини таъкидлайди.
Эмизиш фақат бола учун эмас, балки она учун ҳам кўпгина фойдаларга эга ҳисобланаркан. Жумладан, бачадоннинг тез тикланиши, қон кетиш хавфининг камайиши, ортиқча вазннинг секин-аста йўқолиши, келгусида айрим онкологик касалликлар хавфининг пасайиши.
Хулоса қилиб айтганда, она сути — табиий, маънавий ва тиббий аҳамиятга эга неъмат. У чақалоқнинг соғлом ва бақувват ўсиши учун энг яхши асос. Шу боис мутахассислар болани камида 6 ой тўлиқ эмизишни, бир ёшгача ва ундан кейин ҳам имконият бўлса давом эттиришни тавсия этади.
Ҳилолахон Комилова,
Фарғона вилояти бош отинойиси
***
Ona suti bola uchun Alloh tomonidan berilgan eng ilohiy ne’matdir. U nafaqat to‘g‘ri ovqatlanish manbai, balki chaqaloqning sog‘lom o‘sishi, immuniteti va ruhiy rivojlanishi uchun bebaho omil hisoblanadi. Tibbiyot olimlari bugunga qadar ona sutiga teng keladigan tayyor ozuqa yo‘qligini ta’kidlab keladi.
Mutaxassislarning aytishicha, ona suti bolani turli infeksiya va kasalliklardan himoya qiladigan antitanalarga boy. Ayniqsa, sutning ilk qatlami — qaymoq bolaning birinchi kunlardagi immun qo‘rg‘oni hisoblanadi. U bolani ichak infeksiyasi, pnevmoniya, shamollash kabi ko‘plab xastaliklardan saqlaydi.
Aniqlanishicha, ona suti tarkibi bolaning yoshiga qarab o‘zgarib turadi. Unda belok, tabiiy yog‘lar, vitaminlar, minerallar, fermentlar bolaning organizmiga mutanosib ravishda moslashgan holatda bo‘ladi. Shu bois ona suti bolaning miya faoliyati, nerv tizimi va suyak tuzilishining to‘g‘ri rivojlanishiga katta hissa qo‘shadi.
Emizish jarayoni ona va bola o‘rtasidagi mehr rishtalarini mustahkamlaydi. Bu bolada ishonch hissi, xotirjamlik va ruhiy barqarorlikni shakllantiradi. Psixologlar bu jarayon chaqaloqning keyingi hayotida ham ijobiy ta’sir ko‘rsatishini ta’kidlaydi.
Emizish faqat bola uchun emas, balki ona uchun ham ko‘pgina foydalarga ega hisoblanarkan. Jumladan, bachadonning tez tiklanishi, qon ketish xavfining kamayishi, ortiqcha vaznning sekin-asta yo‘qolishi, kelgusida ayrim onkologik kasalliklar xavfining pasayishi.
Xulosa qilib aytganda, ona suti — tabiiy, ma’naviy va tibbiy ahamiyatga ega ne’mat. U chaqaloqning sog‘lom va baquvvat o‘sishi uchun eng yaxshi asos. Shu bois mutaxassislar bolani kamida 6 oy to‘liq emizishni, bir yoshgacha va undan keyin ham imkoniyat bo‘lsa davom ettirishni tavsiya etadi.
Hilolaxon Komilova,
Farg‘ona viloyati bosh otinoyisi
