Бир ҳикоятда нақл қилинишича, Миср подшоҳи Рум султони билан адоват биносини бузиб, дўстлик риштасини боғлади ва ўз ўғлига унинг қизини никоҳлаб берди. Бу икки давлат соҳиби бир-бири билан дўстлашганидан иккала мамлакат ҳам обод ва фаровон бўлди.
Бир куни Миср подшоҳи Рум шаҳаншоҳига нома юбориб, унда: «Фарзандларимиз ҳаётимизнинг асоси ва тириклигимизнинг нишонасидирлар, бизлар вафот этганимиздан кейин ному-нишонимиз ҳаётда улар орқали яшаб қолади. Мен ўғлим учун ажойиб, нафис матолар ва ҳисобсиз яхши от, туя ва бошқа ҳайвонлар, қуллар, кўшк ва иморатлар захира қилиб қўйдим. Сиз фарзандингизнинг келажаги учун қандай тадбир кўрдингиз?», деб сўради.
Рум подшоҳи мактубни ўқиб, табассум қилди ва дедики: «Мол бевафо, ёру дилдор бебақодир, унинг ҳисобини қилмоқ не керак. Бу беш кунлик ўтар дунёда ўткинчи матоларга алданиш керак эмас. Мен фарзандимни адаб ва тарбия сарпоси билан ораста қилдим, яхши сифат ва одобларни унинг учун заҳира қилдим. Молга завол етади, аммо яхши хулқ, тарбия ўзгармайди ва йўқ бўлмайди». Миср подшоҳи бу сўзлар ростлигини тасдиқлабди.
Ҳикоятдан ҳам кўринадики, фарзандларимизга мол тўплаш орзуси билан эмас, аввало тўғрисўзлик, гўзал хулқ, таълим-тарбия бериш иштиёқи билан зийнатламоғимиз даркор. Шундагина улар ҳам истаганимиздек одобли, саодатли, ватанпарвар, фидойи, ҳалол инсонлар бўлиб улғаядилар. Асосан, мактаб тарбиясидан ҳам олдин оила тарбиясига катта аҳамият бериш зарур. Оилада тўғри йўлга қўйилган тарбия мактаб таълими учун катта мадад. Фарзандларимизни ширинсўз, ҳалол ва меҳнатсевар қилиб тарбиялаб борилсагина, мактабдаги таълим-тарбия ишининг самараси янада юқори муваффақиятли бўлиб бораверади.
Раҳматилло МАДАМИНОВ,
Қўштепа тумани “Эшонгузар” масжиди имом-ноиби
