Жамият тараққиёти, уни ривожланиши, фаровонлигига бир нечта омиллар сабабдир. Бу омиллар қаторида дин ва эътиқоднинг ўрни муҳимдир. Инсон ўз эътиқоди билан яшайди, уни ардоқлайди, унда буюрилган амалларни бажаришга ҳаракат қилади.
Инсоният тарихидан бизга маълумки, дунё давлатлари орасидаги адоватлар ер, сув, мол-дунё, хазиналар учун интилиш ва бошқа сабаблар натижасида динни ниқоб қилиш ва ундан ўз мақсадлари йўлида фойдаланиш ҳаракатлари бўлган. Ислом тарихидан бизга маълумки, Исломнинг аввалида дин душманлари томонидан Ислом динини батамом тугатиш мақсадида кўп марта қуролли жанглар бўлган. Бу ҳаракатлар натижа бермаганидан кейин иккинчи энг хатарли жанг усули бўлган фитна йўли талланган, яъни дин душманлари томонидан исломнинг муқаддас манбаалари бўлмиш Қуръон оятлари ва ҳадислар маъноларини ўзгартиришга ёки бузуб талқин қилишга, жамиятдаги айрим муаммоларни рўкач қилиб, халқни хокимиятга қарши қилишга, тарафкашлик, фирқачилик хийлалари, турли фитналар чиқаришга ҳаракаталар қилинган. Қуръони Карим оятларида “Фитна – қотилликдан ҳам ёмонроқдир” деб марҳамат қилинган. Қотил бир инсонни ўлдириши мумкин, лекин фитна бутун жамиятни пароканда бўлиб, илдизи қирқилишига сабаб бўлади.
Аждодларимиз дини бўлган муқаддас Ислом динимиз таълимотларида дунёда яшаётган барча инсонларга уларнинг динидан, ирқидан, миллатидан қатъий назар яхшилик қилишга, улар билан дунё ишларида хамкор бўлишга, тинч-осуда яшашга даъват қилади. Шу анъаналарга содиқ қолиб, азалдан халқимиз тинчликсевар, саховатли ҳалқ бўлган.
Бир неча асрлардан бери юртимиз мусулмонлари Исломнинг соф эътиқоди бўлмиш Мотурудия ақидавий мазҳабида ҳамда Ҳанафия фиқхий мазҳаби асосида яшайдилар. Шу боис аждодларимиздан ҳозиргача юртимизда бағрикенглик, инсонпарварлик, меҳр-оқибат Ватанга муҳаббат ришталари мустаҳкамдир.
Афсуски, юртимиз истиқлолининг аввалги йилларида хориж ва юртимиздаги дин ниқоби остидаги ғаразли кучлар томонидан юрт тинчлигини, мустақиллигини издан чиқариш, аҳолини ҳукуматга қарши қилиш, натижада ўз ғаразли ниятларини амалга ошириш учун ҳаракатлар қилинди. Шукурки, юртимизда олиб борилган оқилона сиёсат, давлатимиз раҳбарининг келажакни кўра билиши натижасида бу фитналарнинг олди олинди. Муҳтарам биринчи Президентимиз Ислом Каримов кўп маъруза ва нутқларида дин ниқоби остидаги фитначилардан, экстремизм ва терроризм балосидан бутун дунё халқларини огоҳликка чақирар эдилар. Жумладан: “Ислом динини ниқоб қилиб, манфур ишларни амалга ошираётган мутаассиб кучлар хали онги шаклланиб улгурмаган, тажрибасиз, ғўр ёшларни ўз тузоғига илинтириб бош-кўзини айлантириб, улардан ўзининг нопок мақсадлари йўлида фойдаланмоқда. Бундай ножўя харакатлар аввало муқаддас динимизнинг шаънига доғ бўлишини, оҳир-оқибатда эса маънавий хаётимизга салбий таъсир кўрсатишини барчамиз чуқур англаб олишимиз ва шундан хулоса чиқаришимиз зарур.”
Шундай экан, улғайиб бораётган ёшларимизни турли ёт ғоялардан эътиқод ўғриларининг фитналаридан огоҳ этишимиз ва уларга буюк аждодларимиз, мутафаккир алломаларимизнинг таълимотларини тушунтириб сингдириб боришимиз лозим. Шу ўринда биринчи Президентимизнинг яна қуйидаги фикрларини келтиришимиз ўринлидир: “Биз ҳаётга катта орзу-умидлар билан кириб келаётган ёшларимизга бир ҳақиқатни, яъни “Эй болам, сенинг Ватанинг битта – барчамизга азиз, бетакрор мана шу Ўзбекистон. Ота-боболарингнинг ҳоки шу ерда ётибди. Шу муқаддас замин сени дунёга келтирган, сен уни обод этишинг, химоя қилишинг шарт. Нафақат сенинг ўз хаётинг, балки, сенга умид кўзини тикиб турган ота-онанг, опа-сингилларинг, ёш гўдаклар, нуроний қарияларимизнинг хаёти хам мана шу бурчингни нечоғлиқ адо этишинга боғлиқ” деган тушунчани уларнинг қалбига, онгу шуурига сингдиришмиз даркор”.
Маънавий таҳдидларга қарши кураш ота-оналар устозлар биз имом хатиблар хамда шу юртда яшовчи барча фуқаронинг бурчидир.
А.Исахонов,
Қува тумани “Имом Муслим” масжиди имоми
