Сўнгги йилларда мамлакатимизда фуқаролар диний эркинлигини таъминлаш, бағрикенглик, ислом маърифий ғоясини тарғиб қилиш борасида кенг кўламли ислоҳотлар амалга оширилмоқда.
Эътиборли жиҳати, юртимизда янги масжидлар, улуғ аждодларимиз номи билан аталаётган мажмуалар барпо этилмоқда, диний таълим муассасалари очиляпти. Соҳада халқаро ҳамкорлик тобора ривожланиб, чет эллик таниқли уламолар тез-тез диёримизга ташриф буюрмоқда, нуфузли халқаро ташкилотлар билан алоқалар мустаҳкамланяпти. Буларнинг бари юртдошларимизга чексиз қувонч ва ўзгача ғурур бағишлайди.
Маълумки, Имом Ал Бухорий, Имом Ат-Термизий, Шайх Муҳаммад Содиқ Муҳаммад Юсуф каби уламоларимиз Ислом ривожига улкан ҳисса қўшиб, динимиз эзгулик ва бағрикенглик рамзи эканини бутун дунёга тарғиб қилишган.
Табиийки, бугунги глобаллашув замонида ҳам уларнинг хизмати алоҳида эътироф этилади. Шу боис кўплаб сайёҳлар Ўзбекистонга ошиқади.
Давлатимиз раҳбари 2023 йил 19 сентябрь куни БМТ 72-сессиясида “Ислом дини бизни эзгулик ва тинчликка, асл инсоний фазилатларни асраб-авайлашга даъват этади”, дея таъкидлаб, ўлкамизда “Ислом – тинчлик ва эзгулик дини” мавзусида халқаро конференция ўтказиш таклифини илгари сурган эди. Ушбу ташаббусга мувофиқ, мазкур нуфузли тадбир жорий йил 15-16 октябрь кунлари Тошкент ва Хива шаҳарларида ўтказилади.
Анжуманда БМТ Инсон ҳуқуқи бўйича вакиллари, ICESCO, IRCICA каби халқаро тузилмалар раҳбарлари, Саудия Арабистони, Миср, Россия, Туркия, Озарбайжон ва Марказий Осиё давлатлари муфтийлари, Покистон, Ҳиндистон, АҚШ ва Европа давлатлари таниқли уламолари ва тадқиқотчилари иштирок этиши кутиляпти.
Конференцияда бугунги таҳликали ва мураккаб даврда тинчликпарвар ислом динининг бағрикенгликка йўғрилган таълимотини ўрганиш, ўзаро тажриба алмашиш, мавжуд ҳамкорликни мустаҳкамлаш масалалари батафсил муҳокама қилинади.
Муҳим форум олдидан фикр алмашиш мақсадида студиямизга Ўзбекистон Халқаро ислом академияси ректори Уйғун Ғафуровни таклиф этганмиз.
Ўткир Алимов,
Ёқуб Мелибоев (видео),
ЎзА
***
So‘nggi yillarda mamlakatimizda fuqarolar diniy erkinligini ta’minlash, bag‘rikenglik, islom ma’rifiy g‘oyasini targ‘ib qilish borasida keng ko‘lamli islohotlar amalga oshirilmoqda.
E’tiborli jihati, yurtimizda yangi masjidlar, ulug‘ ajdodlarimiz nomi bilan atalayotgan majmualar barpo etilmoqda, diniy ta’lim muassasalari ochilyapti. Sohada xalqaro hamkorlik tobora rivojlanib, chet ellik taniqli ulamolar tez-tez diyorimizga tashrif buyurmoqda, nufuzli xalqaro tashkilotlar bilan aloqalar mustahkamlanyapti. Bularning bari yurtdoshlarimizga cheksiz quvonch va o‘zgacha g‘urur bag‘ishlaydi.
Ma’lumki, Imom Al Buxoriy, Imom At-Termiziy, Shayx Muhammad Sodiq Muhammad Yusuf kabi ulamolarimiz Islom rivojiga ulkan hissa qo‘shib, dinimiz ezgulik va bag‘rikenglik ramzi ekanini butun dunyoga targ‘ib qilishgan.
Tabiiyki, bugungi globallashuv zamonida ham ularning xizmati alohida e’tirof etiladi. Shu bois ko‘plab sayyohlar O‘zbekistonga oshiqadi.
Davlatimiz rahbari 2023 yil 19 sentyabr kuni BMT 72-sessiyasida “Islom dini bizni ezgulik va tinchlikka, asl insoniy fazilatlarni asrab-avaylashga da’vat etadi”, deya ta’kidlab, o‘lkamizda “Islom – tinchlik va ezgulik dini” mavzusida xalqaro konferensiya o‘tkazish taklifini ilgari surgan edi. Ushbu tashabbusga muvofiq, mazkur nufuzli tadbir joriy yil 15-16 oktyabr kunlari Toshkent va Xiva shaharlarida o‘tkaziladi.
Anjumanda BMT Inson huquqi bo‘yicha vakillari, ICESCO, IRCICA kabi xalqaro tuzilmalar rahbarlari, Saudiya Arabistoni, Misr, Rossiya, Turkiya, Ozarbayjon va Markaziy Osiyo davlatlari muftiylari, Pokiston, Hindiston, AQSH va Yevropa davlatlari taniqli ulamolari va tadqiqotchilari ishtirok etishi kutilyapti.
Konferensiyada bugungi tahlikali va murakkab davrda tinchlikparvar islom dinining bag‘rikenglikka yo‘g‘rilgan ta’limotini o‘rganish, o‘zaro tajriba almashish, mavjud hamkorlikni mustahkamlash masalalari batafsil muhokama qilinadi.
Muhim forum oldidan fikr almashish maqsadida studiyamizga O‘zbekiston Xalqaro islom akademiyasi rektori Uyg‘un G‘afurovni taklif etganmiz.
O‘tkir Alimov,
Yoqub Meliboyev (video),
O‘zA
