Жумодус соний ойининг бошланишида турибмиз. Муборак Рамазон ойига ҳам атиги уч ой қолди. Вақтнинг ўтишини қаранг! Гўё кечагина Рамазонни интиқлик билан кутиб олган, рўзалар тутиб, таровеҳ намозларида саф тортган, ҳайит қувончини биргаликда баҳам кўрган эдик.
Бугун эса яна бир Рамазон остонасига яқинлашмоқдамиз.
Бир ўйлаб кўрайлик: вақт тез ўтяптими ёки биз унинг қадрига етишга улгурмаяпмизми? Кунлар ҳафталарга, ҳафталар ойларга уланиб, умримиздан яна бир йил ўтиб бормоқда.
Хўш, биз навбатдаги Рамазонга тайёрмизми?
Аслида, Рамазонга тайёргарлик деганда нимани тушунамиз? Фақат саҳарлик ва ифторлик ташвишлариними? Ёки бу муборак ойни нафсни тарбиялаш, қалбни поклаш, маънан ва руҳан юксалиш учун берилган улкан имконият деб биламизми? Ўтган Рамазондан қандай чиққан эдик? Қалбимиздаги ўша меҳр-оқибат, саховат ва ибодатга бўлган иштиёқ бугун ҳам сақланиб қолдими?
Зеро, Рамазонда қалбимизда уйғонган эзгу туйғулар, меҳр-оқибат ва саховат фақат шу муборак ой билан чекланиб қолмаслиги керак. Ўша кунларда бир-биримизга кўрсатган эътиборимиз, қилган яхшиликларимиз йил давомида ҳам давом этиши нақадар гўзал!
Аслида, Рамазонда қалбимизда уйғонган меҳр-оқибат ва саховат туйғуларини йил давомида ҳам сақлаб қола оляпмизми?
Рамазон кунларида яқинларимиз ҳолидан хабар олишга, бир-биримизга меҳр кўрсатишга, ҳадялар улашиб, муҳтожларнинг кўнглини шод этишга алоҳида эътибор қаратамиз. Ота-онамиз, ака-ука, опа-сингилларимиз билан кўпроқ дийдорлашамиз, ҳайит кунлари эса болажонларга қувонч улашамиз. Қанийди, шу меҳр, шу эътибор ва саховатни фақат Рамазон ва ҳайит кунларида эмас, балки йил давомида ҳам ҳаётимизнинг ажралмас қисмига айлантира олсак.
Яхшиликнинг мавсуми, меҳр-оқибатнинг белгиланган куни йўқ
Тафаккур қиладиган бўлсак, Аллоҳ таоло бизни фақат Рамазонда эмас, балки йилнинг ҳар бир кунида эзгуликка, яхшиликка ва солиҳ амалларга чорлайди. Рамазон бизга бир ой яхши инсон бўлиб яшашни эмас, балки ўша ойда шаклланган гўзал фазилатларни бутун умримиз давомида сақлаб қолишни ўргатиши керак.
Шундай экан, азизлар, келинг, ўзгаришни Рамазонга қолдирмайлик!
Бугундан бошлаб қалбимизни ислоҳ қилайлик. Кимдандир узр сўраш керак бўлса, бугун сўрайлик. Кимнингдир кўнглини олиш керак бўлса, бугун олайлик. Ота-онамизга меҳр кўрсатишни, яқинларимиз ҳолидан хабар олишни, муҳтожларга ёрдам беришни эртага қолдирмайлик. Зеро, биз Рамазонга етиб боришимизга кафолат йўқ. Аммо бугун қўлимизда имконият бор. Умр ғанимат, вақт эса омонатдир.
Аллоҳ таоло барчамизни навбатдаги Рамазонга соғ-саломат, иймон-эътиқодимиз мустаҳкам, қалбимиз пок ҳолда етиб боришни насиб этсин!
Фарғона вилояти вакиллиги Матбуот хизмати
***
Jumodus soniy oyining boşlanişida turibmiz. Muborak Ramazon oyiga ham atigi uç oy qoldi. Vaqtning ötişini qarang! Göyo keçagina Ramazonni intiqlik bilan kutib olgan, rözalar tutib, taroveh namozlarida saf tortgan, hayit quvonçini birgalikda baham körgan edik.
Bugun esa yana bir Ramazon ostonasiga yaqinlaşmoqdamiz.
Bir öylab köraylik: vaqt tez ötyaptimi yoki biz uning qadriga yetişga ulgurmayapmizmi? Kunlar haftalarga, haftalar oylarga ulanib, umrimizdan yana bir yil ötib bormoqda.
Xöş, biz navbatdagi Ramazonga tayyormizmi?
Aslida, Ramazonga tayyorgarlik deganda nimani tuşunamiz? Faqat saharlik va iftorlik taşvişlarinimi? Yoki bu muborak oyni nafsni tarbiyalaş, qalbni poklaş, ma’nan va ruhan yuksaliş uçun berilgan ulkan imkoniyat deb bilamizmi? Ötgan Ramazondan qanday çiqqan edik? Qalbimizdagi öşa mehr-oqibat, saxovat va ibodatga bölgan iştiyoq bugun ham saqlanib qoldimi?
Zero, Ramazonda qalbimizda uyğongan ezgu tuyğular, mehr-oqibat va saxovat faqat şu muborak oy bilan çeklanib qolmasligi kerak. Öşa kunlarda bir-birimizga körsatgan e’tiborimiz, qilgan yaxşiliklarimiz yil davomida ham davom etişi naqadar gözal!
Aslida, Ramazonda qalbimizda uyğongan mehr-oqibat va saxovat tuyğularini yil davomida ham saqlab qola olyapmizmi?
Ramazon kunlarida yaqinlarimiz holidan xabar olişga, bir-birimizga mehr körsatişga, hadyalar ulaşib, muhtojlarning könglini şod etişga alohida e’tibor qaratamiz. Ota-onamiz, aka-uka, opa-singillarimiz bilan köproq diydorlaşamiz, hayit kunlari esa bolajonlarga quvonç ulaşamiz. Qaniydi, şu mehr, şu e’tibor va saxovatni faqat Ramazon va hayit kunlarida emas, balki yil davomida ham hayotimizning ajralmas qismiga aylantira olsak.
Yaxşilikning mavsumi, mehr-oqibatning belgilangan kuni yöq
Tafakkur qiladigan bölsak, Alloh taolo bizni faqat Ramazonda emas, balki yilning har bir kunida ezgulikka, yaxşilikka va solih amallarga çorlaydi. Ramazon bizga bir oy yaxşi inson bölib yaşaşni emas, balki öşa oyda şakllangan gözal fazilatlarni butun umrimiz davomida saqlab qolişni örgatişi kerak.
Şunday ekan, azizlar, keling, özgarişni Ramazonga qoldirmaylik!
Bugundan boşlab qalbimizni isloh qilaylik. Kimdandir uzr söraş kerak bölsa, bugun söraylik. Kimningdir könglini oliş kerak bölsa, bugun olaylik. Ota-onamizga mehr körsatişni, yaqinlarimiz holidan xabar olişni, muhtojlarga yordam berişni ertaga qoldirmaylik. Zero, biz Ramazonga yetib borişimizga kafolat yöq. Ammo bugun qölimizda imkoniyat bor. Umr ğanimat, vaqt esa omonatdir.
Alloh taolo barçamizni navbatdagi Ramazonga soğ-salomat, iymon-e’tiqodimiz mustahkam, qalbimiz pok holda yetib borişni nasib etsin!
Farğona viloyati vakilligi Matbuot xizmati
