Айни кунларда Саудия Арабистонининг Жидда шаҳрида “Ҳаж хизматлари конференцияси ва кўргазмаси” бўлиб ўтмоқда. Дунёнинг турли жойларидан келган соҳа мутасаддилари, халқаро ташкилотлар ва етук мутахассисларни бир жойга жамлаган ушбу йирик тадбирда асосий мавзу – зиёратчиларга хизмат кўрсатиш тизимини янада такомиллаштириш. Жумладан, жараёнларга рақамли технологияларни кенг жорий этиш ва ташкилий ишлар сифатини ошириш масалалари қизғин муҳокама қилинмоқда. Таъкидлаш керакки, ушбу халқаро анжуманда Ўзбекистон делегацияси ҳам фаол иштирок этмоқда.
Нуфузли тадбир доирасида Саудия Арабистонининг Ҳаж ва умра вазири, доктор Тавфиқ бин Фавзон ар-Рабиа махсус маъруза билан чиқиш қилиб, бўлажак “Ҳаж – 2027” мавсуми учун белгиланган янги талаблар ва ташкилий мезонларни эълон қилди. Унга кўра, эндиликда қуйидаги масалаларга жиддий эътибор қаратилади:
Тайёргарлик жараёнларини эрта бошлаш ҳамда хизмат кўрсатувчи ташкилотлар билан шартномаларни ўз вақтида расмийлаштириш;
Меҳмонхоналар ва бошқа яшаш жойларининг белгиланган юксак сифат ҳамда хавфсизлик стандартларига қатъий мос келишини таъминлаш;
Барча ташкилий ва ҳужжатларни расмийлаштириш ишларини фақатгина рақамли «Masar» ягона платформаси орқали амалга ошириш;
Энг муҳими, зиёратчиларга кенг қулайликлар тақдим этадиган ҳамда уларнинг шахсини тасдиқловчи «Nusuk» картасини доимий равишда ёнда олиб юриш талаби қатъий белгилангани алоҳида таъкидлаб ўтилди.
Ўзбекистон делегацияси айнан мана шу янги талаб ва мезонлардан келиб чиққан ҳолда, Ҳаж ва умра вазирлиги мутасаддилари ҳамда етакчи хизмат кўрсатувчи ташкилотларнинг вакиллари билан қатор манфаатли музокаралар ўтказди. Бўлиб ўтган самимий ва амалий мулоқотларда асосий эътибор юртдошларимиз учун яратиладиган шарт-шароитларни янада яхшилаш, кўрсатилаётган хизматлар кўлами ва сифатини янги босқичга олиб чиқишга қаратилди.
Хусусан, музокаралар давомида зиёратчиларимиз ибодатлари учун қулай шароитларни ҳозирлаш, замонавий транспорт воситаларини жалб қилиш, энг шинам турар жойларни танлаш, ҳожиларимизни сифатли таомлар билан таъминлаш масалалари диққат марказида бўлди. Шунингдек, уларнинг хавфсизлиги ва саломатлигини муҳофаза қилиш тизимини янада кучайтириш ҳамда замонавий инновацион технологиялардан унумли фойдаланишга алоҳида урғу берилди.
Бу каби саъй-ҳаракатлар ва эришилган келишувлар келгуси ҳаж мавсумини сифат жиҳатидан мутлақо янги босқичга кўтаришга хизмат қилади. Энг асосийси, юртдошларимиз улуғ амалларини хотиржам, хавфсиз ва энг қулай шароитларда адо этишлари таъминланади.
***
Ayni kunlarda Saudiya Arabistonining Jidda şahrida “Haj xizmatlari konferensiyasi va körgazmasi” bölib ötmoqda. Dunyoning turli joylaridan kelgan soha mutasaddilari, xalqaro taşkilotlar va yetuk mutaxassislarni bir joyga jamlagan uşbu yirik tadbirda asosiy mavzu – ziyoratçilarga xizmat körsatiş tizimini yanada takomillaştiriş. Jumladan, jarayonlarga raqamli texnologiyalarni keng joriy etiş va taşkiliy işlar sifatini oşiriş masalalari qizğin muhokama qilinmoqda. Ta’kidlaş kerakki, uşbu xalqaro anjumanda Özbekiston delegatsiyasi ham faol iştirok etmoqda.
Nufuzli tadbir doirasida Saudiya Arabistonining Haj va umra vaziri, doktor Tavfiq bin Favzon ar-Rabia maxsus ma’ruza bilan çiqiş qilib, bölajak “Haj – 2027” mavsumi uçun belgilangan yangi talablar va taşkiliy mezonlarni e’lon qildi. Unga köra, endilikda quyidagi masalalarga jiddiy e’tibor qaratiladi:
Tayyorgarlik jarayonlarini erta boşlaş hamda xizmat körsatuvçi taşkilotlar bilan şartnomalarni öz vaqtida rasmiylaştiriş;
Mehmonxonalar va boşqa yaşaş joylarining belgilangan yuksak sifat hamda xavfsizlik standartlariga qat’iy mos kelişini ta’minlaş;
Barça taşkiliy va hujjatlarni rasmiylaştiriş işlarini faqatgina raqamli «Masar» yagona platformasi orqali amalga oşiriş;
Eng muhimi, ziyoratçilarga keng qulayliklar taqdim etadigan hamda ularning şaxsini tasdiqlovçi «Nusuk» kartasini doimiy ravişda yonda olib yuriş talabi qat’iy belgilangani alohida ta’kidlab ötildi.
Özbekiston delegatsiyasi aynan mana şu yangi talab va mezonlardan kelib çiqqan holda, Haj va umra vazirligi mutasaddilari hamda yetakçi xizmat körsatuvçi taşkilotlarning vakillari bilan qator manfaatli muzokaralar ötkazdi. Bölib ötgan samimiy va amaliy muloqotlarda asosiy e’tibor yurtdoşlarimiz uçun yaratiladigan şart-şaroitlarni yanada yaxşilaş, körsatilayotgan xizmatlar kölami va sifatini yangi bosqiçga olib çiqişga qaratildi.
Xususan, muzokaralar davomida ziyoratçilarimiz ibodatlari uçun qulay şaroitlarni hozirlaş, zamonaviy transport vositalarini jalb qiliş, eng şinam turar joylarni tanlaş, hojilarimizni sifatli taomlar bilan ta’minlaş masalalari diqqat markazida böldi. Şuningdek, ularning xavfsizligi va salomatligini muhofaza qiliş tizimini yanada kuçaytiriş hamda zamonaviy innovatsion texnologiyalardan unumli foydalanişga alohida urğu berildi.
Bu kabi sa’y-harakatlar va erişilgan kelişuvlar kelgusi haj mavsumini sifat jihatidan mutlaqo yangi bosqiçga kötarişga xizmat qiladi. Eng asosiysi, yurtdoşlarimiz uluğ amallarini xotirjam, xavfsiz va eng qulay şaroitlarda ado etişlari ta’minlanadi.
