Шу йил, 2 май куни Бутунжаҳон форуми доирасидаги тадбирлар Озарбайжоннинг Шуша шаҳрида давом этди. Диний етакчиларнинг Шуша йиғилишда “Ғарб-Шарқ мулоқоти: янги чақириқлар ва мафкуравий таҳдидлар”, “Динни суиистеъмол қилишнинг олдини олиш бўйича биргаликдаги саъй-ҳаракатларни кучайтириш” каби мавзулар юзасидан нотиқлар маърузалар ўқиб, дин пешволари ўз фикр-мулоҳазаларини билдирдилар.
Анжуманда диний конфессиялар етакчилари, маданият соҳаси вакиллари, уламолар, муфтийлар, профессор-олимлар, давлат, жамоат ва дин арбоблари ҳамда халқаро ташкилотлар раҳбарлари бугун дунёда кечаётган мафкуравий таҳдидлар, дин ниқоби остидаги турли фитна ва ёвузликларнинг олдини олиш, диний бағрикенглик масалаларини муҳокама қилдилар.
Хусусан, сўнгги йилларда дунёнинг турли ҳудудларида хавотирли воқеалар тобора кескинлашиб бораётгани, бир қатор минтақаларда низолар кучаяётгани, бу каби қарама-қаршиликларнинг олдини олиш ҳар бир дин пешвосининг бурчи экани ҳамда ҳеч бир дин зўравонликни тарғиб қилмаслиги тўғрисида сўз борди.
Шунингдек, тинчлик-осойишталикни сақлаш йўлида диний бағрикенглик ва ҳамкорлик ғояларини кенг ёйиш, адоват ва муросасизликка олиб борувчи ҳар қандай иллатни бартараф этиш муҳим аҳамият касб этишига урғу қаратилди. Шу боис, бугунги мураккаб бир даврда инсоният учун тинчлик, барқарорлик неъматлари қанчалик катта қийматга эга эканини бутун инсоният чуқур англаб етиши зарурлиги қайд этилди.
Мулоқот якунида форум қатнашчилари дунёда кечаётган долзарб муаммоларни биргаликда ҳал қилишда мазкур йиғинлар муҳим аҳамият касб этишини таъкидладилар ва халқаро анжуманда кўтарилган масалалар юзасидан “Шуша декларацияси” ни қабул қилдилар.
Шунингдек, Форум қатнашчилари Шуша шаҳрининг тарихий-маданий қадамжоларини зиёрат қилдилар.
* * *
Shu yil, 2 may kuni Butunjahon forumi doirasidagi tadbirlar Ozarbayjonning Shusha shahrida davom etdi. Diniy yetakchilarning Shusha yig‘ilishda “G‘arb-Sharq muloqoti: yangi chaqiriqlar va mafkuraviy tahdidlar”, “Dinni suiiste’mol qilishning oldini olish bo‘yicha birgalikdagi sa’y-harakatlarni kuchaytirish” kabi mavzular yuzasidan notiqlar ma’ruzalar o‘qib, din peshvolari o‘z fikr-mulohazalarini bildirdilar.
Anjumanda diniy konfessiyalar yetakchilari, madaniyat sohasi vakillari, ulamolar, muftiylar, professor-olimlar, davlat, jamoat va din arboblari hamda xalqaro tashkilotlar rahbarlari bugun dunyoda kechayotgan mafkuraviy tahdidlar, din niqobi ostidagi turli fitna va yovuzliklarning oldini olish, diniy bag‘rikenglik masalalarini muhokama qildilar.
Xususan, so‘nggi yillarda dunyoning turli hududlarida xavotirli voqealar tobora keskinlashib borayotgani, bir qator mintaqalarda nizolar kuchayayotgani, bu kabi qarama-qarshiliklarning oldini olish har bir din peshvosining burchi ekani hamda hech bir din zo‘ravonlikni targ‘ib qilmasligi to‘g‘risida so‘z bordi.
Shuningdek, tinchlik-osoyishtalikni saqlash yo‘lida diniy bag‘rikenglik va hamkorlik g‘oyalarini keng yoyish, adovat va murosasizlikka olib boruvchi har qanday illatni bartaraf etish muhim ahamiyat kasb etishiga urg‘u qaratildi. Shu bois, bugungi murakkab bir davrda insoniyat uchun tinchlik, barqarorlik ne’matlari qanchalik katta qiymatga ega ekanini butun insoniyat chuqur anglab yetishi zarurligi qayd etildi.
Muloqot yakunida forum qatnashchilari dunyoda kechayotgan dolzarb muammolarni birgalikda hal qilishda mazkur yig‘inlar muhim ahamiyat kasb etishini ta’kidladilar va xalqaro anjumanda ko‘tarilgan masalalar yuzasidan “Shusha deklaratsiyasi” ni qabul qildilar.
Shuningdek, Forum qatnashchilari Shusha shahrining tarixiy-madaniy qadamjolarini ziyorat qildilar.
