Убайдуллоҳ домла Абдуллаев (Фарғона вилояти бош имом-хатиби):
“Икки неъмат борки, кўпчилик одамлар унинг қадрига етмай алданиб қолганлар. У иккиси – сиҳат саломатлик ва фароғат” (Имом Бухорий ривояти).
Биз яшаётган даврда дунёда бир қанча глобал муаммолар юзага чиқди. Шулардан бири гиёҳвандликдир. Ислом инсоннинг эътиқоди, жони, руҳи, молини сақлагани каби унинг ақлини ҳам ҳимоя қилади. Инсон ибодатларни адо қилиши учун комил ақлга эга бўлиши керак. Олимлар маст қилувчи ичимликлар ва гиёҳванд моддаларни истемол қилишдан қаттиқ қайтарган. Чунки гиёҳванд моддалар одамнинг ақли ҳушини йўқотади.
Расулуллоҳ соллаллоҳу алайҳи васаллам ҳар қандай маст қилувчи ва футур етказувчи нарсани истеъмол қилишдан қайтардилар. Маст қилувчи нарсаларни истеъмол қилиш оқибатида инсоннинг нафақат соғлиги, балки ҳаёти хавф остида қолади. Минг афсуски, асримизда маст қилувчи ичимликлар ва гиёҳвандлик моддаларининг турлари кўпайиб кетди. Гиёҳвандлик балоси кенг тарқалиши оқибатида кўз кўриб, қулоқ эшитмаган касалликлар пайдо бўлиб, ҳар йили минглаб одамлар бу офатнинг қурбонига айланмоқдалар. ОИТС деган аср вабосига қарши курашиш учун дунё ҳамжамияти турли тадбирларни амалга оширишига қарамасдан ҳалигача бу дарднинг давоси топилганича йўқ. Шундай экан, мусулмон одам поклик ва ўз саломатлигини асраши қанчалар зарур экани исбот талаб қилмайдиган ҳақиқатга айланди.
Алишер домла Наимов (Фарғона вилояти бош имом-хатиби ўринбосари):
Гиёҳвандлик, бангилик ва ҳар хил наркотик моддларни истеъмол қилиш Аллоҳ таоло инсонга ато этган жон, жисм ва ақл неъматларининг заволи бўлиб, Аллоҳнинг яратиш ҳикмати ва иродасига зид хатти-ҳаракатдир. Ҳаёт қийинчиликларига бардош бера олмай ёки бирор нарсанинг аламига чидаёлмай, ўзини ўзи ўлдириш қотилликдир.
Жўрабек домла Рахмонов (Фарғона шаҳар бош имом-хатиби):
Инсон учун бебаҳо бойлик – бу соғлик-саломатликдир. Уни асраш эса ҳар биримизга омонат қилиб берилган. Шунинг учун ҳам инсон ўз соғлигини эҳтиёт қилиши вожиб амаллардан ҳисобланади. Доно халқимиз “Соғлик – туман бойлик” деб бежиз айтмаган. Ақл-идрок соҳиби бўлган инсон ўз ҳаётини қадрлаши лозим бўлади.
