Аллоҳ таоло Қуръони каримда шундай марҳамат қилади: “Юзларингизни Машриқ ва Мағриб томонларига буришингиз (ибодат қилишингизнинг ўзи тўла) яхшилик эмас, балки Аллоҳга, охират кунига, фаришталарга, китобларга, пайғамбарларга имон келтирган, ўзи яхши кўрган молидан қариндошларига, етимларга, мискинларга, йўловчига, тиланчиларга ва қулларни озод қилиш йўлида берадиган, намозни тўкис адо этиб, закотни тўлаб юрадиган киши ва келишилган аҳдларига вафо қилувчилар, шунингдек, оғир-енгил кунларда ва жанг пайтида сабр қилувчилар яхшилик (аҳли)дир. Айнан ўшалар (имонларида) содиқдирлар ва айнан ўшалар тақводордирлар” (Бақара сураси 177-оят).
Ана шу илоҳий қоидаларни ўзларига дастурул амал қилган диний соҳа ходимлари томонидан эзгу ният билан хайр-саховат кўрсатиш мақсадида амалга ошириб келинаётган ишлар ҳақида хабар бериб келмоқдамиз.
Вилоятдаги имом-хатиблар томонидан ногиронларни ижтимоий ҳимоя қилиш мақсадида турли тадбирлар амалга ошириб келинмоқда. Шундай тадбирлардан бири сифатида Ўзбекистон «Ветеран» жангчи-фахрий ва ногиронлар бирлашмаси Фарғона шаҳар бўлинмаси рўйхатида турувчи кам таъминланган ҳамда ногиронлиги бўлган юртдошларимизга озиқ-овқат махсулотлари тарқатилди. Ушбу савобли ишлар “3 декабрь – Халқаро ногиронлар куни” муносабати билан муносабати билан амалга оширилди.
Барча мўмин-мусулмонлар динимиз кўрсатмаларига амал қилган ҳолда турли хил кўнгли ўксик, ногирон, бетоб бўлган ва кам таъминланган хонадон соҳибларини озгина бўлса ҳам беғараз хайр-эҳсонимиз билан йўқлаб қўйсак, жамият ичида мурувват, меҳр-муҳаббат уруғини сочган бўлардик.
Хулоса қилиб айтадиган бўлсак, нафақа қилиш биз бандалардан, унинг савобини бериш, тақдирлаш эса Аллоҳдан.
Ҳусниддин Турсунзода,
Фарғона шаҳар «Нур» масжиди имом-хатиби
