Бугун, Фарғона шаҳридаги «Уммул қуро» масжидида «Қуръони карим ва тажвид» курсининг 12 давра битирувчилари иштирокида тадбир бўлиб ўтди. Унда вилоят бош имом-хатиби Убайдуллоҳ домла Абдуллаев иштирок этиб нутқ сўзлади.
— Бугун, Аллоҳнинг марҳамати ила юртимиздаги диний-маърифий соҳадаги ислоҳотлар сабаб яна бир нечта хонадонда Қуръони карим тиловати янграш имконияти юзага келди. Биз энди Аллоҳнинг каломини нафақат тажвид ва тартил билан ўқишлигимиз, балки хулқимиз, феълимизни ҳам Қуръонга мувофиқ бўлишга интилишимиз лозим. Чунки Расулуллоҳ соллаллоҳу алайҳи васалламнинг хулқлари Қуръон эди, — дея таъкидлади вилоят бош имом-хатиби.
Шунингдек, тадбирда иштирок этган вилоят бош отинойиси Ҳилолахон Комилова оила ва жамиятда аёл-қизларнинг ўрни, айниқса, фарзанд тарбиясида илк ўрнак бўлувчи ҳамда биринчи тарбиячи ҳам она экани, шу боис ҳам оналар аввало ўзлари муносиб тарбиячи мақомини эгаллаши лозимлиги, бу эса динимизнинг асосий талаблариларидан бири эканини қайд этди.
«Қуръони карим ва тажвид» курсининг 60 нафар битирувчиларига махсус шаҳодатномалар топширилиб, янги давра бошланиши олдидан дуойи хайрлар қилинди.
