Айни кунларда юртимиз бўйлаб 1600 дан зиёд жоме масжидларда таровеҳ намозларида хатми Қуръонлар қилинаётгани мўмин-мусулмонларнинг Каломуллоҳга соме бўлишларини таъминламоқда. Шу билан бирга, уламоларимизнинг жомеларга ташриф буюриб, намозхонларга мавъизалар қилиб бераётгани масжидларни файзга, юртдошларимиз қалбини нурга тўлдирмоқда.
Кеча, 20 март куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари пойтахтдаги HiTech услубида янгидан қурилган «Ҳасанхон қори» масжидида жамоат билан бирга таровеҳ намозини адо этиб, намозхонларга Рамазон раҳмат ойи экани тўғрисида мавъиза қилдилар.
Муфтий ҳазратлари ўз сўзида муборак Рамазон ойида беморлар ҳолидан хабар олиш, инсонларга янада меҳр-эътибор кўрсатиш халқимизнинг эзгу қадрияти эканини қайд этдилар. Хусусан, куни кеча Юртбошимиз 1-сонли “Мурувват” интернат уйи тарбияланувчилари ҳолидан хабар олиб, улар билан суҳбатлашиб, меҳрини изҳор қилганига алоҳида тўхталдилар. Бундай саховат ишларида юртдошларимиз ҳам шижоатли бўлиш лозимлигига урғу қаратдилар.
* * *
Ayni kunlarda yurtimiz bo‘ylab 1600 dan ziyod jome masjidlarda taroveh namozlarida xatmi Qur’onlar qilinayotgani mo‘min-musulmonlarning Kalomullohga some bo‘lishlarini ta’minlamoqda. Shu bilan birga, ulamolarimizning jomelarga tashrif buyurib, namozxonlarga mav’izalar qilib berayotgani masjidlarni fayzga, yurtdoshlarimiz qalbini nurga to‘ldirmoqda.
Kecha, 20 mart kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari poytaxtdagi HiTech uslubida yangidan qurilgan «Hasanxon qori» masjidida jamoat bilan birga taroveh namozini ado etib, namozxonlarga Ramazon rahmat oyi ekani to‘g‘risida mav’iza qildilar.
Muftiy hazratlari o‘z so‘zida muborak Ramazon oyida bemorlar holidan xabar olish, insonlarga yanada mehr-e’tibor ko‘rsatish xalqimizning ezgu qadriyati ekanini qayd etdilar. Xususan, kuni kecha Yurtboshimiz 1-sonli “Muruvvat” internat uyi tarbiyalanuvchilari holidan xabar olib, ular bilan suhbatlashib, mehrini izhor qilganiga alohida to‘xtaldilar. Bunday saxovat ishlarida yurtdoshlarimiz ham shijoatli bo‘lish lozimligiga urg‘u qaratdilar.
