Азон – Аллоҳнинг тоати, ибодати, ҳидояти, Унинг даргоҳига чорловидир. Аллоҳга бўлган муҳаббатнинг танларга нидоси, қалбларга эса тажаллиси бу – азондир. Пайғамбаримиз соллаллоҳу алайҳи васаллам: “Мени намоз ўқиётганимда кўриб турганларингдек намоз ўқинглар. Агар намоз вақти кирса бирларингиз азон айтсин ва катталарингиз имом бўлсин”, дея марҳамат қилганлар.
Дарҳақиқат, азонни эшитган мўминнинг қалбига фараҳ иниб, ибодатга шошади. Маромига етказиб, гўзал совт ва тараннум ила айтилган азондан эса кўнгиллар ҳузур топади. Шу боис ҳам динимиз таълимотларида муаззинларга катта эътибор қаратилган.
Шуларни эътиборга олган ҳолда муаззинлар учун икки кунлик ўқув-семинар ташкил этилди. Семинарда маҳоратли имом-хатиблар томонидан муаззинлар билиши зарур бўлган шаръий ҳукмлар, азон айтишда риоя қилиш лозим бўлган жиҳатларни очиб берувчи дарс ва машғулотлар ўтиб берилди.
Жараён билан яқиндан танишиш, муаззинлар салоҳиятини ўрганиш мақсадида 11 ноябрь куни Ўзбекистон мусулмонлари идораси «Қуръон тажвидини ўргатиш» бўлими мудири шайх Алижон қори Хайдаров Фарғона вилоятига ташриф буюрди. Вилоят вакиллигида ташкил этилган учрашувда шайх Алижон қори Хайдаров муаззинлар билан суҳбатлашиб, уларнинг азон айтиш маҳоратини кўздан кечирди ва уларга керакли тавсияларни берди.
Учрашув якунида вилоят бош имом-хатиби Убайдуллоҳ домла Абдуллаев муаззинларнинг азон айтиш маҳоратини синовдан ўтказиш борасида бошланган иш айни муддао бўлганини таъкидлаб, бунга бош бўлган муфтий ҳазратлари ҳамда шайх Алижон қорига ташаккур билдириб, ҳақларига дуо қилдилар.
