Шу йил, 20 июнь куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари иштирокларида “Ҳаж – 2024” мавсуми делегацияси аъзолари, ишчи гуруҳи, элликбошилар, шифокорлар ва ошпазлар жамоалари иштирокида ҳаж ибодати муваффақиятли амалга оширилгани юзасидан йиғилиш бўлиб ўтди.
“Ҳаж – 2024” мавсуми тўғрисида Дин ишлари бўйича қўмита бошқарма бошлиғи Бобомурод Рустамов ахборот берди. Жумладан зиёратчиларни кузатиш, кутиб олиш, меҳмонхоналарга жойлаштириш, Машоирдаги ишлар, тиббий ва транспорт хизматлари намунали ташкил этилгани каби масалалар бўйича батафсил маълумот тақдим этди.
Муфтий ҳазратлари ўзбекистонлик зиёратчиларнинг ҳаж амаллари шариатга мувофиқ, чиройли адо этилганини билдириб, Мино, Арафот, Муздалифа, Жамаротдаги ибодатлар ва қурбонликлар ўз вақтида бажарилганини алоҳида таъкидладилар. Бунинг учун тинимсиз меҳнат қилган ишчи гуруҳи, мингбошилар, элликбошилар, шифокорлар ва ошпазлар жамоаларига миннатдорлик изҳор этдилар.
Шунингдек, ҳаж мавсуми давомида юртимиз ҳожилари Исломнинг бешинчи фарзини бажариш чоғида ҳукуматимизнинг бевосита кўмагини, беқиёс ғамхўрлигини ҳис қилиб турганлари, улар учун барча шарт-шароитлар муҳайё этилганини алоҳида қайд этдилар. Айниқса, Президентимизнинг ҳожилар ҳолидан хабар олиб қўнғироқ қилгани, Қурбон ҳайити билан бутун халқимизни қутлагани барча юртдошларимиз қатори ҳаж сафарида юрган ҳамюртларимизни ҳам ниҳоятда қувонтирганини Шайх Нуриддин Холиқназар ҳазратлари алоҳида таъкидладилар.
Эндиликда юртдошларимиз ҳожилик мақомига муносиб бўлиш, шундай шарафга эришган кишилар ибрат кўрсатиши ва жамиятда маърифат тарқатишлари зарурлигига алоҳида урғу қаратилди.
***
Shu yil, 20 iyun kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari ishtiroklarida “Haj – 2024” mavsumi delegatsiyasi a’zolari, ishchi guruhi, ellikboshilar, shifokorlar va oshpazlar jamoalari ishtirokida haj ibodati muvaffaqiyatli amalga oshirilgani yuzasidan yig‘ilish bo‘lib o‘tdi.
“Haj – 2024” mavsumi to‘g‘risida Din ishlari bo‘yicha qo‘mita boshqarma boshlig‘i Bobomurod Rustamov axborot berdi. Jumladan ziyoratchilarni kuzatish, kutib olish, mehmonxonalarga joylashtirish, Mashoirdagi ishlar, tibbiy va transport xizmatlari namunali tashkil etilgani kabi masalalar bo‘yicha batafsil ma’lumot taqdim etdi.
Muftiy hazratlari o‘zbekistonlik ziyoratchilarning haj amallari shariatga muvofiq, chiroyli ado etilganini bildirib, Mino, Arafot, Muzdalifa, Jamarotdagi ibodatlar va qurbonliklar o‘z vaqtida bajarilganini alohida ta’kidladilar. Buning uchun tinimsiz mehnat qilgan ishchi guruhi, mingboshilar, ellikboshilar, shifokorlar va oshpazlar jamoalariga minnatdorlik izhor etdilar.
Shuningdek, haj mavsumi davomida yurtimiz hojilari Islomning beshinchi farzini bajarish chog‘ida hukumatimizning bevosita ko‘magini, beqiyos g‘amxo‘rligini his qilib turganlari, ular uchun barcha shart-sharoitlar muhayyo etilganini alohida qayd etdilar. Ayniqsa, Prezidentimizning hojilar holidan xabar olib qo‘ng‘iroq qilgani, Qurbon hayiti bilan butun xalqimizni qutlagani barcha yurtdoshlarimiz qatori haj safarida yurgan hamyurtlarimizni ham nihoyatda quvontirganini Shayx Nuriddin Xoliqnazar hazratlari alohida ta’kidladilar.
Endilikda yurtdoshlarimiz hojilik maqomiga munosib bo‘lish, shunday sharafga erishgan kishilar ibrat ko‘rsatishi va jamiyatda ma’rifat tarqatishlari zarurligiga alohida urg‘u qaratildi.
