Юртимизда диний-маърифий соҳада, хусусан, Қуръони карим ва тажвид илмини ўрганиш борасида амалга оширилаётган ишлар изчил давом этмоқда. Ана шундай эзгу мақсадлар йўлида Ўзбекистон мусулмонлари идораси раҳбарияти ва мутахассислари томонидан жойларда учрашувлар ташкил этиб келинмоқда.
Шу муносабат билан Ўзбекистон мусулмонлари идораси раиси ўринбосари Муҳаммадолим домла Муҳаммадсиддиқов, Тошкент ислом институти ректори Уйғун домла Ғофуров ҳамда “Қуръони карим ва тажвид ўргатиш курси” масъуллари Фарғона вилоятига ташриф буюрдилар.
Меҳмонларни вилоят бош имом-хатиби Убайдуллоҳ домла Абдуллаев, бош имом ўринбосари Алишер домла Наимов ҳамда вилоят вакиллиги масъуллари кутиб олдилар.
Тадбир доирасида Тошкент ислом институти қошида фаолият юритаётган Фарғона шаҳри ҳамда Бувайда туманидаги “Қуръони карим ва тажвид” ўқув курсларининг навбатдаги битирувчилари иштирокида учрашув ташкил этилди. Унда тингловларнинг эришган ютуқлари, Қуръони карим ва тажвид илмини ўзлаштириш борасидаги интилишлари эътироф этилди.
Учрашув давомида сўзга чиққан маърузачилар томонидан мамлакатимизда амалга оширилаётган кенг кўламли ислоҳотлар, юртимиздаги тинчлик ва барқарорлик муҳитининг беқиёс аҳамияти ҳақида мазмунли фикрлар билдирилди. Шунингдек, ана шундай тинч ва осуда ҳаёт неъматини қадрлаш, унга шукроналик билан яшаш, илм ва маърифат йўлида изланиш, айниқса, ёшларни юксак билим ва гўзал ахлоқ эгаси қилиб тарбиялаш зарурлиги таъкидланди.
Тадбирда Қуръони карим ва тажвид илмини ўргатиш йўлида муносиб ҳисса қўшаётган масъуллар ҳамда ҳамкорлар Тошкент ислом институти номидан ташаккурнома ва эсдалик совғалари билан тақдирландилар.
Шунингдек, ўқув курсини муваффақиятли тамомлаган тингловчиларга устозлар томонидан сертификатлар топширилди.
Учрашув ниҳоясида юртимиз тинчлиги ва барқарорлиги, ёш авлоднинг баркамол инсонлар бўлиб вояга етиши тилаб дуо қилинди.
***
Yurtimizda diniy-maʼrifiy sohada, xususan, Qurʼoni karim va tajvid ilmini o‘rganish borasida amalga oshirilayotgan ishlar izchil davom etmoqda. Ana shunday ezgu maqsadlar yo‘lida O‘zbekiston musulmonlari idorasi rahbariyati va mutaxassislari tomonidan joylarda uchrashuvlar tashkil etib kelinmoqda.
Shu munosabat bilan O‘zbekiston musulmonlari idorasi raisi o‘rinbosari Muhammadolim domla Muhammadsiddiqov, Toshkent islom instituti rektori Uyg‘un domla G‘ofurov hamda “Qurʼoni karim va tajvid o‘rgatish kursi” masʼullari Farg‘ona viloyatiga tashrif buyurdilar.
Mehmonlarni viloyat bosh imom-xatibi Ubaydulloh domla Abdullayev, bosh imom o‘rinbosari Alisher domla Naimov hamda viloyat vakilligi masʼullari kutib oldilar.
Tadbir doirasida Toshkent islom instituti qoshida faoliyat yuritayotgan Farg‘ona shahri hamda Buvayda tumanidagi “Qurʼoni karim va tajvid” o‘quv kurslarining navbatdagi bitiruvchilari ishtirokida uchrashuv tashkil etildi. Unda tinglovlarning erishgan yutuqlari, Qurʼoni karim va tajvid ilmini o‘zlashtirish borasidagi intilishlari eʼtirof etildi.
Uchrashuv davomida so‘zga chiqqan maʼruzachilar tomonidan mamlakatimizda amalga oshirilayotgan keng ko‘lamli islohotlar, yurtimizdagi tinchlik va barqarorlik muhitining beqiyos ahamiyati haqida mazmunli fikrlar bildirildi. Shuningdek, ana shunday tinch va osuda hayot neʼmatini qadrlash, unga shukronalik bilan yashash, ilm va maʼrifat yo‘lida izlanish, ayniqsa, yoshlarni yuksak bilim va go‘zal axloq egasi qilib tarbiyalash zarurligi taʼkidlandi.
Tadbirda Qurʼoni karim va tajvid ilmini o‘rgatish yo‘lida munosib hissa qo‘shayotgan masʼullar hamda hamkorlar Toshkent islom instituti nomidan tashakkurnoma va esdalik sovg‘alari bilan taqdirlandilar.
Shuningdek, o‘quv kursini muvaffaqiyatli tamomlagan tinglovchilarga ustozlar tomonidan sertifikatlar topshirildi.
Uchrashuv nihoyasida yurtimiz tinchligi va barqarorligi, yosh avlodning barkamol insonlar bo‘lib voyaga yetishi tilab duo qilindi.
