Дин ишлари бўйича қўмита ҳузуридаги Диний-маърифий соҳада малака ошириш ва қайта тайёрлаш институти томонидан хотин-қизлар фаоллари, тарғибот гуруҳи аъзолари ҳамда отинойилар учун “Хотин-қизларни радикал ғоялар таъсиридан ҳимоя қилиш тизимини мустаҳкамлаш асослари” йўналишида сайёр малака ошириш ўқувлари бошланди. Мазкур ўқувлар жамиятда барқарорликни мустаҳкамлаш, хотин-қизлар орасида соғлом маънавий муҳитни шакллантиришга қаратилгани билан аҳамиятлидир.
Айни пайтда ушбу ўқув семинарида Фарғона вилоятида фаолият олиб бораётган отинойилар фаол иштирок этмоқда. Улар ўз касбий билим ва кўникмаларини янада бойитиш, замонавий таҳдидларга қарши маърифий ёндашувни кучайтириш мақсадида машғулотларда фаол қатнашмоқдалар.
Ўқув семинари давомида бир қатор долзарб мавзулар муҳокама марказида бўлади. Жумладан, отинойиларнинг касбий салоҳиятини юксалтириш, маънавий-маърифий ишлар самарадорлигини ошириш йўллари, аҳоли ўртасида учраётган бидъат ва хурофотларнинг олдини олишда уларнинг ўрни, шунингдек, ислом динининг асосий қадриятларини тўғри тарғиб этиш масалалари атрофлича кўриб чиқилади.
Машғулотлар таниқли устоз ва уламолар, шунингдек, малакали профессор-ўқитувчилар томонидан олиб борилади. Бу эса ўқувларнинг мазмунли ва самарали ўтишига хизмат қилиб, иштирокчиларнинг назарий ва амалий билимларини мустаҳкамлашга имкон яратиши билан эътиборлидир.
Бугун ўқув семинарининг дастлабки жараёнлари бошланди. Унда Ўзбекистон мусулмонлари идораси раиси ўринбосари Муҳаммадолим домла Муҳаммадсиддиқов, Тошкент ислом институти ректори Уйғун домла Ғофуров ҳамда вилоят бош имом-хатиби Убайдуллоҳ домла Абдуллаев белгиланган мавзулар юзасидан маърузалар билан иштирок этдилар. Маърузаларда замонавий таҳдидларга қарши маърифий кураш, жамиятда соғлом диний муҳитни мустаҳкамлаш ва хотин-қизлар билан ишлашнинг долзарб жиҳатлари ҳақида муҳим фикрлар билдирилди.
Албатта, бундай ўқув семинарлари отинойиларнинг билим ва малакасини ошириш, уларнинг жамиятдаги ўрни ва нуфузини мустаҳкамлаш, шунингдек, аҳоли ўртасида соғлом маънавий муҳитни шакллантиришда муҳим аҳамият касб этади.
***
Din ishlari bo‘yicha qo‘mita huzuridagi Diniy-maʼrifiy sohada malaka oshirish va qayta tayyorlash instituti tomonidan xotin-qizlar faollari, targ‘ibot guruhi aʼzolari hamda otinoyilar uchun “Xotin-qizlarni radikal g‘oyalar taʼsiridan himoya qilish tizimini mustahkamlash asoslari” yo‘nalishida sayyor malaka oshirish o‘quvlari boshlandi. Mazkur o‘quvlar jamiyatda barqarorlikni mustahkamlash, xotin-qizlar orasida sog‘lom maʼnaviy muhitni shakllantirishga qaratilgani bilan ahamiyatlidir.
Ayni paytda ushbu o‘quv seminarida Farg‘ona viloyatida faoliyat olib borayotgan otinoyilar faol ishtirok etmoqda. Ular o‘z kasbiy bilim va ko‘nikmalarini yanada boyitish, zamonaviy tahdidlarga qarshi maʼrifiy yondashuvni kuchaytirish maqsadida mashg‘ulotlarda faol qatnashmoqdalar.
O‘quv seminari davomida bir qator dolzarb mavzular muhokama markazida bo‘ladi. Jumladan, otinoyilarning kasbiy salohiyatini yuksaltirish, maʼnaviy-maʼrifiy ishlar samaradorligini oshirish yo‘llari, aholi o‘rtasida uchrayotgan bidʼat va xurofotlarning oldini olishda ularning o‘rni, shuningdek, islom dinining asosiy qadriyatlarini to‘g‘ri targ‘ib etish masalalari atroflicha ko‘rib chiqiladi.
Mashg‘ulotlar taniqli ustoz va ulamolar, shuningdek, malakali professor-o‘qituvchilar tomonidan olib boriladi. Bu esa o‘quvlarning mazmunli va samarali o‘tishiga xizmat qilib, ishtirokchilarning nazariy va amaliy bilimlarini mustahkamlashga imkon yaratishi bilan eʼtiborlidir.
Bugun o‘quv seminarining dastlabki jarayonlari boshlandi. Unda O‘zbekiston musulmonlari idorasi raisi o‘rinbosari Muhammadolim domla Muhammadsiddiqov, Toshkent islom instituti rektori Uyg‘un domla G‘ofurov hamda viloyat bosh imom-xatibi Ubaydulloh domla Abdullayev belgilangan mavzular yuzasidan maʼruzalar bilan ishtirok etdilar. Maʼruzalarda zamonaviy tahdidlarga qarshi maʼrifiy kurash, jamiyatda sog‘lom diniy muhitni mustahkamlash va xotin-qizlar bilan ishlashning dolzarb jihatlari haqida muhim fikrlar bildirildi.
Albatta, bunday o‘quv seminarlari otinoyilarning bilim va malakasini oshirish, ularning jamiyatdagi o‘rni va nufuzini mustahkamlash, shuningdek, aholi o‘rtasida sog‘lom maʼnaviy muhitni shakllantirishda muhim ahamiyat kasb etadi.
