Бугун, 1 май куни Озарбайжоннинг Боку шаҳрида “Тинчлик ва глобал хавфсизлик йўлидаги мулоқот” мавзусида Бутунжаҳон маданиятлараро мулоқотининг VI форуми ўз ишини бошлади. Очилиш маросимида Озарбайжон Республикаси Президенти Илҳом Алиев иштирокчиларга муваффақият тилаб, мазкур анжуман маданиятлараро мулоқотнинг муҳим майдонига айланаётганини билдирди.
Халқаро анжуманда БМТ альянси, ЮНEСКО, АЙСЕСКО, Жаҳон туризм ташкилоти ва дунёнинг турли мамлакатларидан келган диний конфессиялар етакчилари, маданият соҳаси вакиллари, вазирлар, таниқли уламолар, машҳур муфтийлар, профессор-олимлар, давлат, жамоат ва дин арбоблари ҳамда халқаро ташкилотлар раҳбарлари иштирок этмоқда.
Озарбайжон маданият вазири Одил Каримли ва Кавказ мусулмонлари идораси раиси Шайхулислом Оллоҳшукур Пошозоданинг таклифига биноан Ўзбекистон мусулмонлари идораси раиси, муфтий Шайх Нуриддин Холиқназар ҳазратлари ҳам қатнашмоқда.
Форум жаҳон ҳамжамиятининг эътиборини яна бир бор замонавий таҳдидлар, тинчлик-хавфсизлик муаммолари, урушлар, қарама-қаршиликлар, динлараро муросасизлик кабиларга қаратиб, жаҳон ҳамжамиятини тинчлик-осойишталикни қарор топтиришга чақирмоқда. Шунингдек, илм-фан, таълим, ёшлар, иқлим ўзгариши, маданий меросни муҳофаза қилиш, ксенофобия ва ноқонуний миграция каби мавзулар муҳокама этилмоқда.
Сўзга чиққан нотиқлар “Динлар ва диний етакчиларнинг халқаро хавфсизликка қўшган ҳиссаси”, “Ижтимоий тармоқлар ва дин: имкониятлар ва муаммолар”, “Динлараро мулоқот орқали ишончни мустаҳкамлаш”, “Терроризм, диний ва ирқий муросасизлик, нафратга чақириш ва ксенофобия халқаро хавфсизликка таҳдид”, “Диннинг иқлим ўзгариши ва атроф-муҳит муаммоларига муносабати” каби мавзуларда чиқиш қилдилар.
Очилиш маросимидан кейин Озарбайжон Республикаси Президенти Илҳом Алиев жаноблари Туркий давлатлар муфтийлари билан тор доирада мулоқот ўтказди.
Ушбу форум доирасида «Динлараро мулоқот орқали ишончни мустаҳкамлаш” мавзусида диний етакчиларнинг Баку учрашуви ўтказилди. Унда Муфтий Шайх Нуриддин Холиқназар ҳазратлари нутқ сўзлаб, жаҳонда тинчлик-осойишталикни қарор топтиришда дин пешволарининг ўрни ҳақида сўз юритдилар.
Форум тадбирлари 3 майга қадар давом этади.
* * *
Bugun, 1 may kuni Ozarbayjonning Boku shahrida “Tinchlik va global xavfsizlik yo‘lidagi muloqot” mavzusida Butunjahon madaniyatlararo muloqotining VI forumi o‘z ishini boshladi. Ochilish marosimida Ozarbayjon Respublikasi Prezidenti Ilhom Aliyev ishtirokchilarga muvaffaqiyat tilab, mazkur anjuman madaniyatlararo muloqotning muhim maydoniga aylanayotganini bildirdi.
Xalqaro anjumanda BMT alyansi, YUNESKO, AYSЕSKO, Jahon turizm tashkiloti va dunyoning turli mamlakatlaridan kelgan diniy konfessiyalar yetakchilari, madaniyat sohasi vakillari, vazirlar, taniqli ulamolar, mashhur muftiylar, professor-olimlar, davlat, jamoat va din arboblari hamda xalqaro tashkilotlar rahbarlari ishtirok etmoqda.
Ozarbayjon madaniyat vaziri Odil Karimli va Kavkaz musulmonlari idorasi raisi Shayxulislom Ollohshukur Poshozodaning taklifiga binoan O‘zbekiston musulmonlari idorasi raisi, muftiy Shayx Nuriddin Xoliqnazar hazratlari ham qatnashmoqda.
Forum jahon hamjamiyatining e’tiborini yana bir bor zamonaviy tahdidlar, tinchlik-xavfsizlik muammolari, urushlar, qarama-qarshiliklar, dinlararo murosasizlik kabilarga qaratib, jahon hamjamiyatini tinchlik-osoyishtalikni qaror toptirishga chaqirmoqda. Shuningdek, ilm-fan, ta’lim, yoshlar, iqlim o‘zgarishi, madaniy merosni muhofaza qilish, ksenofobiya va noqonuniy migratsiya kabi mavzular muhokama etilmoqda.
So‘zga chiqqan notiqlar “Dinlar va diniy yetakchilarning xalqaro xavfsizlikka qo‘shgan hissasi”, “Ijtimoiy tarmoqlar va din: imkoniyatlar va muammolar”, “Dinlararo muloqot orqali ishonchni mustahkamlash”, “Terrorizm, diniy va irqiy murosasizlik, nafratga chaqirish va ksenofobiya xalqaro xavfsizlikka tahdid”, “Dinning iqlim o‘zgarishi va atrof-muhit muammolariga munosabati” kabi mavzularda chiqish qildilar.
Ochilish marosimidan keyin Ozarbayjon Respublikasi Prezidenti Ilhom Aliyev janoblari Turkiy davlatlar muftiylari bilan tor doirada muloqot o‘tkazdi.
Ushbu forum doirasida «Dinlararo muloqot orqali ishonchni mustahkamlash” mavzusida diniy yetakchilarning Baku uchrashuvi o‘tkazildi. Unda Muftiy Shayx Nuriddin Xoliqnazar hazratlari nutq so‘zlab, jahonda tinchlik-osoyishtalikni qaror toptirishda din peshvolarining o‘rni haqida so‘z yuritdilar.
Forum tadbirlari 3 mayga qadar davom etadi.
