Шу йил, 19 январь куни Қоҳирада Миср Президенти Абдулфаттоҳ ас-Сиси ташаббуси билан ташкил этилган сунъий интеллект даврида касблар ва соҳалар истиқболига оид халқаро конференция бошланди. Унда Ўзбекистон мусулмонлари идораси раиси, муфтий Шайх Нуриддин Холиқназар ҳазратлари бошчилигидаги делегация иштирок этмоқда.
Қуръони карим тиловати ва хайрли дуолар билан бошланган анжуман очилиш маросимида Миср Вақф вазири, профессор Усома Саййид Азҳарий, Миср бош имоми ўринбосари, Азҳари шариф вакили, доктор Муҳаммад Абдурраҳмон ад-Дувайний, мамлакат муфтийси Назир Муҳаммад Айёд, таниқли уламо Шавқий Аллом, Россия марказий диний идораси раиси, муфтий Талъат Тожиддин, Баҳрайн ислом ишлари бўйича олий кенгаш раиси Шайх Абдураҳмон бин Муҳаммад бин Рошид ал-Халифа, Иордания Вақф, ислом ишлари ва муқаддас қадамжолар вазири Муҳаммад Аҳмад Муслим ал-Халояла каби давлат ва дин арбоблари, мусулмон оламининг нуфузли шахслари ҳамда 50 га яқин давлатдан илмий тадқиқот ва диний муассасаларнинг олим ва мутахассислари қатнашмоқда.
Халқаро анжуманда иштирокчилар сунъий интеллект даврида илм-фан, соҳалар ва касб-ҳунарнинг тараққиёт ривожидаги ўрни ва истиқболи тўғрисида маъруза қилишади. Шунингдек, Ислом оламида айни йўналишдаги амалий ютуқлар сарҳисоб қилиниб, замонавий фиқҳий масалаларга биргаликда ечим бериш каби илмий масалалар муҳокама этилади.
***
Миср давлати раҳбари Абдулфаттоҳ ас-Сиси Ислом ишлари бўйича Олий Кенгаш томонидан ўтказилаётган халқаро анжуманнинг энг нуфузли уламоларини қабул қилди. Мулоқотда Ўзбекистон мусулмонлари идораси раиси, муфтий Шайх Нуриддин Холиқназар ҳазратлари ҳам иштирок этди.
Президент ўз сўзида бугунги таҳдидларга қарши биргаликда курашиш, барқарорликни мустаҳкамлашда диний ташкилотлар ролини ошириш ҳамда Ислом дини моҳиятини ёйишда ижтимоий тармоқлар ва замонавий технологиялардан фойдаланишга урғу қаратди. Мана шундай конференциялар исломий қадриятлар билан рақамли келажак ўртасида кўприк вазифасини бажаришини изоҳлаш баробарида Ислом замон билан ҳамнафас дин эканини алоҳида қайд этди.
Мулоқотда бузғунчи ғояларга қарши тура оладиган, бунёдкорлик ва тараққиётга ҳисса қўшадиган баркамол авлодни шакллантириш, динни низо ва баҳс майдонига айлантиришдан сақланиш, халқларни адашган тоифалар таъсирига тушиб қолишидан муҳофаза қилиш долзарблиги таъкидланди.
Шу боис ҳам Миср етакчиси уламоларнинг вайронкор таълимотларга қарши туришдаги масъулиятини ошириш, Ислом маърифатидан ҳамжиҳатлик ва фаровонлик йўлида фойдаланиш муҳимлигига тўхталди. Бу борада, аввало, диний соҳа ходимлари фаолиятини ривожлантириш ва уларни ҳар жиҳатдан қўллаб-қувватлаш зарурлигини билдирди. Шу билан бирга, масжидлар фақат ибодат жойи эмас, балки маърифат маскани сифатида фаолият юритиши кераклигини айтиб ўтди.
Учрашувда муборак динимизнинг эзгулик ва тинчликка чорлаш каби инсонпарварлик мақсадларини кенг тарғиб этиш, жамиятда миллатлараро тотувлик, диний бағрикенглик муҳитини янада мустаҳкамлаш ҳамда сунъий интеллект даврида турли соҳалар ривожланиши ва замонавий масалаларга биргаликда ечим топиш мавзуларида ҳам сўз юритилди.
***
Shu yil, 19 yanvar kuni Qohirada Misr Prezidenti Abdulfattoh as-Sisi tashabbusi bilan tashkil etilgan sun’iy intellekt davrida kasblar va sohalar istiqboliga oid xalqaro konferensiya boshlandi. Unda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari boshchiligidagi delegatsiya ishtirok etmoqda.
Qur’oni karim tilovati va xayrli duolar bilan boshlangan anjuman ochilish marosimida Misr Vaqf vaziri, professor Usoma Sayyid Azhariy, Misr bosh imomi o‘rinbosari, Azhari sharif vakili, doktor Muhammad Abdurrahmon ad-Duvayniy, mamlakat muftiysi Nazir Muhammad Ayyod, taniqli ulamo Shavqiy Allom, Rossiya markaziy diniy idorasi raisi, muftiy Tal’at Tojiddin, Bahrayn islom ishlari bo‘yicha oliy kengash raisi Shayx Abdurahmon bin Muhammad bin Roshid al-Xalifa, Iordaniya Vaqf, islom ishlari va muqaddas qadamjolar vaziri Muhammad Ahmad Muslim al-Xaloyala kabi davlat va din arboblari, musulmon olamining nufuzli shaxslari hamda 50 ga yaqin davlatdan ilmiy tadqiqot va diniy muassasalarning olim va mutaxassislari qatnashmoqda.
Xalqaro anjumanda ishtirokchilar sun’iy intellekt davrida ilm-fan, sohalar va kasb-hunarning taraqqiyot rivojidagi o‘rni va istiqboli to‘g‘risida ma’ruza qilishadi. Shuningdek, Islom olamida ayni yo‘nalishdagi amaliy yutuqlar sarhisob qilinib, zamonaviy fiqhiy masalalarga birgalikda yechim berish kabi ilmiy masalalar muhokama etiladi.
***
Misr davlati rahbari Abdulfattoh as-Sisi Islom ishlari bo‘yicha Oliy Kengash tomonidan o‘tkazilayotgan xalqaro anjumanning eng nufuzli ulamolarini qabul qildi. Muloqotda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari ham ishtirok etdi.
Prezident o‘z so‘zida bugungi tahdidlarga qarshi birgalikda kurashish, barqarorlikni mustahkamlashda diniy tashkilotlar rolini oshirish hamda Islom dini mohiyatini yoyishda ijtimoiy tarmoqlar va zamonaviy texnologiyalardan foydalanishga urg‘u qaratdi. Mana shunday konferensiyalar islomiy qadriyatlar bilan raqamli kelajak o‘rtasida ko‘prik vazifasini bajarishini izohlash barobarida Islom zamon bilan hamnafas din ekanini alohida qayd etdi.
Muloqotda buzg‘unchi g‘oyalarga qarshi tura oladigan, bunyodkorlik va taraqqiyotga hissa qo‘shadigan barkamol avlodni shakllantirish, dinni nizo va bahs maydoniga aylantirishdan saqlanish, xalqlarni adashgan toifalar ta’siriga tushib qolishidan muhofaza qilish dolzarbligi ta’kidlandi.
Shu bois ham Misr yetakchisi ulamolarning vayronkor ta’limotlarga qarshi turishdagi mas’uliyatini oshirish, Islom ma’rifatidan hamjihatlik va farovonlik yo‘lida foydalanish muhimligiga to‘xtaldi. Bu borada, avvalo, diniy soha xodimlari faoliyatini rivojlantirish va ularni har jihatdan qo‘llab-quvvatlash zarurligini bildirdi. Shu bilan birga, masjidlar faqat ibodat joyi emas, balki ma’rifat maskani sifatida faoliyat yuritishi kerakligini aytib o‘tdi.
Uchrashuvda muborak dinimizning ezgulik va tinchlikka chorlash kabi insonparvarlik maqsadlarini keng targ‘ib etish, jamiyatda millatlararo totuvlik, diniy bag‘rikenglik muhitini yanada mustahkamlash hamda sun’iy intellekt davrida turli sohalar rivojlanishi va zamonaviy masalalarga birgalikda yechim topish mavzularida ham so‘z yuritildi.
