Жорий йилнинг 13 май куни Ўзбекистон мусулмонлари идораси тасарруфидаги «Кўкалдош» ўрта махсус ислом билим юртида битирувчи курс талабаларининг «Хатмона – 2024» байрам тадбири бўлиб ўтди.
Файзли маросимда Ўзбекистон мусулмонлари идораси раиси ўринбосари Зайниддин домла Эшонқулов, «Кўкалдош» ўрта махсус ислом билим юрти мудири Абдулҳаким қори Матқулов, Диний идора бўлим мудирлари, таниқли уламолар, устоз-мураббийлар ва талаба-ёшлар иштирок этишди.
Хатмонада сўзга чиққан нотиқлар охирги йилларда юртимизда амалга оширилаётган диний-маърифий соҳадаги ислоҳотлар, ёшларнинг илм ва касб-ҳунар эгаллашлари учун берилаётган имкониятлар, диний таълим сифатини ошириш борасидаги янгиланишларни сўзлаш баробарида битирувчиларнинг келгуси фаолиятига муваффақият тиладилар.
Маросим якунида фаол талабалар, уларнинг жонкуяр устозларига мақтов ёрлиқлари ва битирувчилар ота-оналарига ташаккурномалар тақдим этилди.
Сўнгра «Қуръон базмига марҳабо» номи билан ўтказилган қорилар мусобақаси бошланди. Ушбу мусобақада билим юрти талабалари «Мужаввид» ва «Мураттаб» йўналишлари бўйича беллашишди. Мусобақада умумий ҳисобда жами ўн тўрт (тўрт нафари «Мужавидлик» йўналиши ва ўн нафари «Мураттаблик» йўналиши) нафар талаба қатнашди.
Иштироқчиларнинг Аллоҳнинг китобини қанчалик моҳирлик билан ўқишларини Қуръони Карим ходимлари Жаҳонгир қори Неъматов, Ҳасанхон Яҳё Абдулмажид, Аваз қори Давлетов, Абдулбосит қори Қобилов, Валихон қори Азимбоев ва Исмоил қори Қурбоновлардан иборат ҳакамлар ҳайъати баҳолаб бордилар.
Мусобақа жуда кўтаринки руҳда ўтди. Қориларнинг бир-биридан гўзал қироатлари қалбларга сурур бағишлади. Якуний натижаларга кўра,
«Мужаввидлик» йўналиши бўйича:
1- ўринни 3 босқич талабаси Муҳаммадсолиҳ қори Эргашхўжаев эгаллади.
«Мураттаблик» йўналишида:
1-ўринга 2 босқич талабаси Шукрулло қори Шуҳратбеков лойиқ деб топилди.
Иккала йўналишда олий ўринни қайд этган мусобақа ғолибларига «Турон тур» сайёҳлик агентлиги томонидан қимматбаҳо совғалар топширилди.
Шунингдек, 9 май куни «Кўкалдош» ўрта махсус ислом билим юртининг Қуръони Каримни бир ўтиришда ёддан ўқиб берган талабаларининг оналарига шундай фарзандни вояга етказишда қилган меҳнатлари учун «Хадичаи Кубро» аёл-қизлар ўрта махсус ислом билим юрти томонида эсдалик совғалар тақдим этилди.
Тадбир давомида «Кўкалдош» ўрта махсус ислом билим юрти раҳбарияти томонидан ҳакамлар ҳайъати ҳам қимматбаҳо совғалар билан тақдирланди.
Тадбир якунида барчамизга севимли устоз қори Ҳасанхон Яҳё Абдулмажид мусобақада иштироқ этган барча қориларимиз ҳамда мадрасамиз талабаларининг келгусидаги илм таҳсиллари хайрли ва баракотли бўлиши тилаб дуо қилиб бердилар.
* * *
Joriy yilning 13 may kuni O‘zbekiston musulmonlari idorasi tasarrufidagi «Ko‘kaldosh» o‘rta maxsus islom bilim yurtida bitiruvchi kurs talabalarining «Xatmona – 2024» bayram tadbiri bo‘lib o‘tdi.
Fayzli marosimda O‘zbekiston musulmonlari idorasi raisi o‘rinbosari Zayniddin domla Eshonqulov, «Ko‘kaldosh» o‘rta maxsus islom bilim yurti mudiri Abdulhakim qori Matqulov, Diniy idora bo‘lim mudirlari, taniqli ulamolar, ustoz-murabbiylar va talaba-yoshlar ishtirok etishdi.
Xatmonada so‘zga chiqqan notiqlar oxirgi yillarda yurtimizda amalga oshirilayotgan diniy-ma’rifiy sohadagi islohotlar, yoshlarning ilm va kasb-hunar egallashlari uchun berilayotgan imkoniyatlar, diniy ta’lim sifatini oshirish borasidagi yangilanishlarni so‘zlash barobarida bitiruvchilarning kelgusi faoliyatiga muvaffaqiyat tiladilar.
Marosim yakunida faol talabalar, ularning jonkuyar ustozlariga maqtov yorliqlari va bitiruvchilar ota-onalariga tashakkurnomalar taqdim etildi.
So‘ngra «Qur’on bazmiga marhabo» nomi bilan o‘tkazilgan qorilar musobaqasi boshlandi. Ushbu musobaqada bilim yurti talabalari «Mujavvid» va «Murattab» yo‘nalishlari bo‘yicha bellashishdi. Musobaqada umumiy hisobda jami o‘n to‘rt (to‘rt nafari «Mujavidlik» yo‘nalishi va o‘n nafari «Murattablik» yo‘nalishi) nafar talaba qatnashdi.
Ishtiroqchilarning Allohning kitobini qanchalik mohirlik bilan o‘qishlarini Qur’oni Karim xodimlari Jahongir qori Ne’matov, Hasanxon Yahyo Abdulmajid, Avaz qori Davletov, Abdulbosit qori Qobilov, Valixon qori Azimboyev va Ismoil qori Qurbonovlardan iborat hakamlar hay’ati baholab bordilar.
Musobaqa juda ko‘tarinki ruhda o‘tdi. Qorilarning bir-biridan go‘zal qiroatlari qalblarga surur bag‘ishladi. Yakuniy natijalarga ko‘ra,
«Mujavvidlik» yo‘nalishi bo‘yicha:
1- o‘rinni 3 bosqich talabasi Muhammadsolih qori Ergashxo‘jayev egalladi.
«Murattablik» yo‘nalishida:
1-o‘ringa 2 bosqich talabasi Shukrullo qori Shuhratbekov loyiq deb topildi.
Ikkala yo‘nalishda oliy o‘rinni qayd etgan musobaqa g‘oliblariga «Turon tur» sayyohlik agentligi tomonidan qimmatbaho sovg‘alar topshirildi.
Shuningdek, 9 may kuni «Ko‘kaldosh» o‘rta maxsus islom bilim yurtining Qur’oni Karimni bir o‘tirishda yoddan o‘qib bergan talabalarining onalariga shunday farzandni voyaga yetkazishda qilgan mehnatlari uchun «Xadichai Kubro» ayol-qizlar o‘rta maxsus islom bilim yurti tomonida esdalik sovg‘alar taqdim etildi.
Tadbir davomida «Ko‘kaldosh» o‘rta maxsus islom bilim yurti rahbariyati tomonidan hakamlar hay’ati ham qimmatbaho sovg‘alar bilan taqdirlandi.
Tadbir yakunida barchamizga sevimli ustoz qori Hasanxon Yahyo Abdulmajid musobaqada ishtiroq etgan barcha qorilarimiz hamda madrasamiz talabalarining kelgusidagi ilm tahsillari xayrli va barakotli bo‘lishi tilab duo qilib berdilar.
