Аввал хабар берганимиздек, бугун, 1 март куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари жума намозини Фарғона вилоятининг Бувайда туманидаги “Эшонбобо” жоме масжидида адо этдилар.
Муфтий ҳазратлари дастлаб “Ҳар соҳада пешқадамлик динимиз кўрсатмасидир” мавзусида мазмунли суҳбат қилиб бердилар. Унда мусулмонлар жамиятнинг барча соҳасида пешқадам бўлиши лозимлиги, бу даражага илму маърифат, динимизнинг гўзал таълимотлари ва буюк аждодларимиз ўгитига амал қилиш орқали эришиш мумкинлиги, бу борада ёш авлод таълим-тарбиясига, айниқса, жиддий эътибор беришимиз лозимлиги шаръий далил ва ҳаётий мисоллар билан тушунтириб берилди.
Шу билан бирга Шайх Нуриддин Холиқназар ҳазратлари яқинлашиб келаётган Рамазон ойига ҳар бир мўмин-мусулмон маънавий тайёргарлик кўриши, аввало ниятни гўзал қилиши, ёмон иллатлардан воз кечиши, гина-кудуратларни унутиб, қалбни яхшиликлар ила тўлдириши лозимлиги таъкидладилар. Шунингдек, эҳтиёжманд оилалар ҳолидан хабар олиш, ота-она ва яқин қариндошларига силаи раҳм қилиш кераклигини қайд этдилар.
Якунда Ватан равнақи, дин ривожи бунданда юксалиши, барча эзгу ишларда пешқадам бўлишмизни сўраб хайрли дуолар қилинди.
* * *
Avval xabar berganimizdek, bugun, 1 mart kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari juma namozini Farg‘ona viloyatining Buvayda tumanidagi “Eshonbobo” jome masjidida ado etdilar.
Muftiy hazratlari dastlab “Har sohada peshqadamlik dinimiz ko‘rsatmasidir” mavzusida mazmunli suhbat qilib berdilar. Unda musulmonlar jamiyatning barcha sohasida peshqadam bo‘lishi lozimligi, bu darajaga ilmu ma’rifat, dinimizning go‘zal ta’limotlari va buyuk ajdodlarimiz o‘gitiga amal qilish orqali erishish mumkinligi, bu borada yosh avlod ta’lim-tarbiyasiga, ayniqsa, jiddiy e’tibor berishimiz lozimligi shar’iy dalil va hayotiy misollar bilan tushuntirib berildi.
Shu bilan birga Shayx Nuriddin Xoliqnazar hazratlari yaqinlashib kelayotgan Ramazon oyiga har bir mo‘min-musulmon ma’naviy tayyorgarlik ko‘rishi, avvalo niyatni go‘zal qilishi, yomon illatlardan voz kechishi, gina-kuduratlarni unutib, qalbni yaxshiliklar ila to‘ldirishi lozimligi ta’kidladilar. Shuningdek, ehtiyojmand oilalar holidan xabar olish, ota-ona va yaqin qarindoshlariga silai rahm qilish kerakligini qayd etdilar.
Yakunda Vatan ravnaqi, din rivoji bundanda yuksalishi, barcha ezgu ishlarda peshqadam bo‘lishmizni so‘rab xayrli duolar qilindi.
