Бугун Ўзбекистон мусулмонлари идораси раиси, муфтий, Шайх Нуриддин Холиқназар ҳазратлари Тошкент шаҳридaги «Ислом ота” жоме масжидига ташриф буюриб, жума намозини жамоат билан адо этдилар.
Муфтий ҳазратлари Исломда аёлларга бўлган ҳурмат ва эътибор юқори экани, динимизнинг барча ҳукмларида уларга ғамхўрлик, меҳрибонлик ва лутф билан муомала қилингани, инсонийлик жиҳатидан барча бир хил экани, фақат тақво, солиҳ амал, ахлоқ-одоб каби мезон орқали фарқланиши ҳақида суҳбат қилиб бердилар.
Манфаатли мавъиза давомида Қуръони каримдадаги: “Эркакми ё аёлми – кимда-ким мўмин бўлган ҳолида бирор эзгу иш қилса, бас, Биз унга ёқимли ҳаёт бахш этурмиз ва уларни ўзлари қилиб ўтган гўзал (солиҳ) амаллари баробаридаги мукофот билан тақдирлаймиз” (Наҳл, 97) оятини шарҳлаш асносида тарихдан аёлларнинг ўрни эркакларникидан кам бўлмаганлиги саҳобия оналаримиз ва буюк аждодларимизни камолга етказган олима ва фозила аёллар ҳаётидан мисоллар келтирган ҳолда тушунтириб берилди.
Шайх Нуриддин Холиқназар ҳазратлари суҳбат асносида қизларни мана шундай ўқимишли ва зукко қилиб тарбиялашимиз лозимлиги, доно халқимизда: “Ўғил фарзандни ўқитсанг бирни ўқитган бўласан, қиз фарзандни ўқитсанг жамиятни ўқитган бўласан”, деган ўгит бежиз айтилмагани, шу боис қиз болани ўқитсак, у эртага она бўлганда жамиятимизга фойдаси тегадиган фарзандларни тарбиялашини алоҳида қайд этдилар.
* * *
Bugun O‘zbekiston musulmonlari idorasi raisi, muftiy, Shayx Nuriddin Xoliqnazar hazratlari Toshkent shahridagi «Islom ota” jome masjidiga tashrif buyurib, juma namozini jamoat bilan ado etdilar.
Muftiy hazratlari Islomda ayollarga bo‘lgan hurmat va e’tibor yuqori ekani, dinimizning barcha hukmlarida ularga g‘amxo‘rlik, mehribonlik va lutf bilan muomala qilingani, insoniylik jihatidan barcha bir xil ekani, faqat taqvo, solih amal, axloq-odob kabi mezon orqali farqlanishi haqida suhbat qilib berdilar.
Manfaatli mav’iza davomida Qur’oni karimdadagi: “Erkakmi yo ayolmi – kimda-kim mo‘min bo‘lgan holida biror ezgu ish qilsa, bas, Biz unga yoqimli hayot baxsh eturmiz va ularni o‘zlari qilib o‘tgan go‘zal (solih) amallari barobaridagi mukofot bilan taqdirlaymiz” (Nahl, 97) oyatini sharhlash asnosida tarixdan ayollarning o‘rni erkaklarnikidan kam bo‘lmaganligi sahobiya onalarimiz va buyuk ajdodlarimizni kamolga yetkazgan olima va fozila ayollar hayotidan misollar keltirgan holda tushuntirib berildi.
Shayx Nuriddin Xoliqnazar hazratlari suhbat asnosida qizlarni mana shunday o‘qimishli va zukko qilib tarbiyalashimiz lozimligi, dono xalqimizda: “O‘g‘il farzandni o‘qitsang birni o‘qitgan bo‘lasan, qiz farzandni o‘qitsang jamiyatni o‘qitgan bo‘lasan”, degan o‘git bejiz aytilmagani, shu bois qiz bolani o‘qitsak, u ertaga ona bo‘lganda jamiyatimizga foydasi tegadigan farzandlarni tarbiyalashini alohida qayd etdilar.
