Аллоҳга ҳамдлар бўлсин, юртдошларимизнинг бу йилги ҳаж ибодатлари ҳам юқори савияда, тартибли ва муваффақиятли ўтди. Шу муносабат билан мавсум давомида кечани кеча, кундузни кундуз демай сидқидилдан хизмат қилган ишчи гуруҳи, малакали шифокорлар ҳамда моҳир ошпазларни тақдирлашга бағишланган тадбир ўтказилди.
Бир пиёла чой устида ташкил этилган йиғин анъанага мувофиқ Қуръони карим тиловати билан бошланди.
Йиғилганларга мавсумнинг энг ҳаяжонли ва фидокорона лаҳзалари муҳрланган махсус видеоролик намойиш этилди.
Тадбирда дастлаб Дин ишлари бўйича қўмита раиси Содиқжон Тошбоев сўзга чиқиб, мавсум давомида кўрсатилган фидокорлик учун иштирокчиларга миннатдорлик билдирди.
Ҳаж мавсуми давомида юртимиз ҳожилари, айниқса, бу йил илк бор “Президент ҳожиси” сифатида борган жорий этилган 100 нафар фидоий юртдошларимиз Давлатимизнинг бевосита кўмаги ва ғамхўрлигини ҳис қилиб турганлари, улар учун барча шарт-шароитлар муҳайё этилганини алоҳида қайд этди.
Ўзбекистон мусулмонлари идораси раиси, муфтий Шайх Нуриддин Холиқназар ҳазратлари ўз нутқида бу йилги ҳаж сафари Муҳтарам Юртбошимизнинг бевосита кўрсатмалари, мутасадди ташкилотларнинг ҳамкорликдаги хизмати эвазига янги босқичга кўтарилганини эътироф этдилар. Бу нарса, айниқса, Мино, Арафот, Муздалифа ва Жамарот майдонларида зиёратчиларнинг хавфсиз ва тартибли ҳаракатланиши, ибодатларини хотиржам адо этишларида кузатилганини таъкидладилар. Шунингдек, ҳамюртларимизнинг ҳаж ибодати кўтаринки руҳда ўтгани Саудия Арабистони мутасаддилари томонидан ҳам юқори баҳолангани қайд этилди.
Шундан сўнг «Ҳаж-2026» мавсумида жонбозлик кўрсатган Ишчи гуруҳи аъзолари, шифокорлар жамоаси ҳамда моҳир ошпазларга ташкилотчиларнинг ташаккурномалари, эсдалик ҳадялари топширилди.
***
Allohga hamdlar bo‘lsin, yurtdoshlarimizning bu yilgi haj ibodatlari ham yuqori saviyada, tartibli va muvaffaqiyatli o‘tdi. Shu munosabat bilan mavsum davomida kechani kecha, kunduzni kunduz demay sidqidildan xizmat qilgan ishchi guruhi, malakali shifokorlar hamda mohir oshpazlarni taqdirlashga bag‘ishlangan tadbir o‘tkazildi.
Bir piyola choy ustida tashkil etilgan yig‘in an’anaga muvofiq Qur’oni karim tilovati bilan boshlandi.
Yig‘ilganlarga mavsumning eng hayajonli va fidokorona lahzalari muhrlangan maxsus videorolik namoyish etildi.
Tadbirda dastlab Din ishlari bo‘yicha qo‘mita raisi Sodiqjon Toshboyev so‘zga chiqib, mavsum davomida ko‘rsatilgan fidokorlik uchun ishtirokchilarga minnatdorlik bildirdi.
Haj mavsumi davomida yurtimiz hojilari, ayniqsa, bu yil ilk bor “Prezident hojisi” sifatida borgan joriy etilgan 100 nafar fidoiy yurtdoshlarimiz Davlatimizning bevosita ko‘magi va g‘amxo‘rligini his qilib turganlari, ular uchun barcha shart-sharoitlar muhayyo etilganini alohida qayd etdi.
O‘zbekiston musulmonlari idorasi raisi, muftiy Shayx Nuriddin Xoliqnazar hazratlari o‘z nutqida bu yilgi haj safari Muhtaram Yurtboshimizning bevosita ko‘rsatmalari, mutasaddi tashkilotlarning hamkorlikdagi xizmati evaziga yangi bosqichga ko‘tarilganini e’tirof etdilar. Bu narsa, ayniqsa, Mino, Arafot, Muzdalifa va Jamarot maydonlarida ziyoratchilarning xavfsiz va tartibli harakatlanishi, ibodatlarini xotirjam ado etishlarida kuzatilganini ta’kidladilar. Shuningdek, hamyurtlarimizning haj ibodati ko‘tarinki ruhda o‘tgani Saudiya Arabistoni mutasaddilari tomonidan ham yuqori baholangani qayd etildi.
Shundan so‘ng «Haj-2026» mavsumida jonbozlik ko‘rsatgan Ishchi guruhi a’zolari, shifokorlar jamoasi hamda mohir oshpazlarga tashkilotchilarning tashakkurnomalari, esdalik hadyalari topshirildi.
