Саудия Арабистонида хизмат сафарида бўлиб турган Ўзбекистон делегацияси “Ҳаж – 2025” мавсумига тайёргарлик кўриш доирасида бир нечта меҳмонхоналар, транспорт воситалари, таом тайёрлаш ошхоналари, озиқ-овқат омборлари ва хизмат кўрсатувчи турли идоралар билан танишиб, юксак даражада хизмат кўрсатиш мезонлари ва юқори сифат талаблари нуқтаи назаридан таҳлилий ўрганиб чиқилди.
Мазкур соҳалар билан яқиндан танишиш жараёнида Дин ишлари бўйича қўмита раиси Содиқжон Тошбоев ва муфтий Шайх Нуриддин Холиқназар ҳазратлари ўзбекистонлик ҳожилар ибодатларини тўкис адо этишлари учун барча қулай шарт-шароитлар ҳозирлашга алоҳида эътибор қаратишди.
Хусусан, меҳмонхоналарни кўздан кечириш чоғида делегация аъзолари уларнинг кириш фойелари кенглиги, лифтлар сони, хоналардаги шароитлар, ўринлар сони, ошхона сиғими, ишчи ва тиббиёт гуруҳлари хизмат кўрсатишлари учун ажратилган жойлар билан яқиндан танишдилар. Айтиб ўтиш лозимки, мутасаддилар ўзбекистонлик зиёратчилар ҳузурланиб ибодат қилишлари учун ҳозирданоқ қизғин тайёргарлик кўришни бошлаб юборишган.
Маълумки, ҳожиларимиз учун ўзбекистонлик моҳир ошпазлар ҳар мавсумда тансиқ таомлар тайёрлаб беришади. Бунинг учун Макка шаҳрида иккита катта ошхона ажратилган бўлиб, 10 дан зиёд ошпаз хизмат сафарига жалб этилади. Ушбу ошхоналарда эрталабки нонушта, тушлик ва кечки таомда икки хилдан иссиқ овқат тайёрланади.
Таомномага кўра, миллий таомлар, хусусан, ош, турли хил шўрвалар, мошкичири, балиқ маҳсулотлари ҳам тортиқ қилинади. Делегация аъзолари мазкур ошхоналар озодалиги ва сиғими, санитария-гигиена талабларига жавоб бериши, озиқ-овқат маҳсулотларини сақлаш омборлари ва таом тайёрлаш анжомларини ҳам кўздан кечиришди.
Бу ўрганишлардан кўзланган асосий мақсад ҳожиларимиз тоат-ибодатларини кўтаринки руҳ ва юқори кайфиятда адо этишларига замин яратиш, сиҳат-саломатликларини доимий назорат қилиш, бир сўз билан айтганда, уларни рози қилишдир.
***
Saudiya Arabistonida xizmat safarida bo‘lib turgan O‘zbekiston delegatsiyasi “Haj – 2025” mavsumiga tayyorgarlik ko‘rish doirasida bir nechta mehmonxonalar, transport vositalari, taom tayyorlash oshxonalari, oziq-ovqat omborlari va xizmat ko‘rsatuvchi turli idoralar bilan tanishib, yuksak darajada xizmat ko‘rsatish mezonlari va yuqori sifat talablari nuqtayi nazaridan tahliliy o‘rganib chiqildi.
Mazkur sohalar bilan yaqindan tanishish jarayonida Din ishlari bo‘yicha qo‘mita raisi Sodiqjon Toshboyev va muftiy Shayx Nuriddin Xoliqnazar hazratlari o‘zbekistonlik hojilar ibodatlarini to‘kis ado etishlari uchun barcha qulay shart-sharoitlar hozirlashga alohida e’tibor qaratishdi.
Xususan, mehmonxonalarni ko‘zdan kechirish chog‘ida delegatsiya a’zolari ularning kirish foyelari kengligi, liftlar soni, xonalardagi sharoitlar, o‘rinlar soni, oshxona sig‘imi, ishchi va tibbiyot guruhlari xizmat ko‘rsatishlari uchun ajratilgan joylar bilan yaqindan tanishdilar. Aytib o‘tish lozimki, mutasaddilar o‘zbekistonlik ziyoratchilar huzurlanib ibodat qilishlari uchun hozirdanoq qizg‘in tayyorgarlik ko‘rishni boshlab yuborishgan.
Ma’lumki, hojilarimiz uchun o‘zbekistonlik mohir oshpazlar har mavsumda tansiq taomlar tayyorlab berishadi. Buning uchun Makka shahrida ikkita katta oshxona ajratilgan bo‘lib, 10 dan ziyod oshpaz xizmat safariga jalb etiladi. Ushbu oshxonalarda ertalabki nonushta, tushlik va kechki taomda ikki xildan issiq ovqat tayyorlanadi.
Taomnomaga ko‘ra, milliy taomlar, xususan, osh, turli xil sho‘rvalar, moshkichiri, baliq mahsulotlari ham tortiq qilinadi. Delegatsiya a’zolari mazkur oshxonalar ozodaligi va sig‘imi, sanitariya-gigiyena talablariga javob berishi, oziq-ovqat mahsulotlarini saqlash omborlari va taom tayyorlash anjomlarini ham ko‘zdan kechirishdi.
Bu o‘rganishlardan ko‘zlangan asosiy maqsad hojilarimiz toat-ibodatlarini ko‘tarinki ruh va yuqori kayfiyatda ado etishlariga zamin yaratish, sihat-salomatliklarini doimiy nazorat qilish, bir so‘z bilan aytganda, ularni rozi qilishdir.
