Айни вақтда юртимиздан ҳаж ибодатини амалга ошириш мақсадида бўлган мўмин-мусулмонлар икки ҳарами шарифда ибодатларни адо этмоқдалар. Фарғоналик зиёратчилар ҳам умра амалларини бажариб, ҳаж маносикларини адо этишга тайёргарлик кўришмоқда. Улар кунлик ибодатларини масжидул ҳарамда ўқимоқдалар. Шунингдек, зикр, тиловат ва дуолар билан машғул бўлмоқдалар.
Айниқса, таниқли уламолар, гуруҳ раҳбарлари иштирокида ўтказилаётган учрашув, мулоқотлар зиёратчиларни мамнун этмоқда. Ҳаж амаллари бошлагунга қадар шу каби учрашувлар орқали таниқли устоз, уламоларнинг суҳбатидан ҳузур олмоқдалар. Устозлар томонидан ҳаж маносикларини бажариш тартиби, ҳожилик мақоми ва одоби, ибодат дуолар қабул бўладиган ғанимат кун ва маконларнинг фазилатлари баён қилинмоқда.
Ана шундай учрашувлардан бири Маккаи мукаррамадаги “Ар-Рошидия” меҳмонхонасида бўлиб ўтди. Унда Республика ишчи гуруҳидан Зулхайдар Султонов, Фарғона вилояти вакиллиги ходими, гуруҳ раҳбари Иқболжон Аҳмадалиев ҳамда гуруҳ раҳбарлари ва зиёратчилар иштирок этишди.
Ишчи гуруҳ томонидан ҳаж амалларини бажаришга доир ташкилий масалалар, эътибор қаратиш лозим бўлган ишларга алоҳида тўхталинди. Шунингдек, Марғилон шаҳридаги “Робия ҳожи она” масжиди имом-хатиби Раҳматуллоҳ домла Файзуллаев томонидан қилинган мавъиза зиёратчиларда катта таассурот қолдирди.
Мулоқот давомида зиёратчилар ўзларини қизиқтирган саволларга жавоб олдилар.
