Фарғонада ташкилот ва корхоналар ҳамда жамоат ташкилотларида ижтимоий-маънавий муҳит барқарорлигини таъминлаш, экстремизм ва терроризмнинг салбий оқибатларини кенг тушунтиришга қаратилган “Жаҳолатга қарши маърифат” шиори остидаги тарғибот тадбирлари бўлиб ўтмоқда.
Ана шундай тадбирлардан бири “Фарғона Азот” МЧЖда ўтказилди. Тадбирда Фарғона шаҳар бош имом-хатиби Жўрабек Раҳмонов иштирок этиб, Ислом динида илм-маърифатга, инсон қадрига бўлган эътибор ҳамда тинчлик ва хотиржамликнинг қадрига етиш ҳақида сўз юритди.
Шунингдек, тадбирда сўзга олганлар хатарли таҳдиддан сақланишнинг ягона йўли маърифат эканлиги, муқаддас динимизда яхшилик қилиш, яратилаётган шароитларга шукроналик ҳисси билан яшаш лозимлиги ҳаётий мисоллар орқали тушунтириб берилди.
Самимий руҳда ўтган очиқ мулоқот сўнгида иштирокчилар ўз фикр мулоҳазаларини билдириб, халқимиз, хусусан ёшларимизнинг маънавий дунёсини бойитиш йўлида бир тану бир жон бўлиб хизмат қилажакларини таъкидлаб ўтишди.
