Ўзбекистон мусулмонлари идораси Имом Бухорий номидаги Тошкент ислом институти ҳамда унинг ҳамкори Фарғона вилояти Бувайда туманидаги “Қуръони карим ва тажвид” ўқув курсининг биринчи тингловчилари учун битирув маросими бўлиб ўтди. Унда вилоят бош имом-хатиби Убайдуллоҳ домла Абдуллаев, Бувайда тумани бош имом-хатиби Аҳмадхон домла Низомов ва бошқа мутасаддилар иштирок этди.
Маросимда вилоят бош имом-хатиби Убайдуллоҳ домла Абдуллаев нутқ сўзлаб, Аллоҳнинг марҳамати ила юртимиздаги диний-маърифий соҳадаги ислоҳотлар сабаб яна бир нечта хонадонда Қуръони карим тиловати янграш имконияти яратилди, дея таъкидлади. — Биз энди Аллоҳнинг каломини нафақат тажвид ва тартил билан ўқишлигимиз, балки хулқимиз, феълимизни ҳам Қуръонга мувофиқ бўлишга интилишимиз лозим. Чунки Расулуллоҳ соллаллоҳу алайҳи васалламнинг хулқлари Қуръон эди, дея қайд этилди.
«Қуръони карим ва тажвид» курсининг 60 нафар битирувчиларига махсус шаҳодатномалар топширилиб, янги давра бошланиши олдидан дуойи хайрлар қилинди.
