Барчамизни Аллоҳ таоло яратган. Тақдирларимизни иҳота қилувчи ягона Зот ҳам фақатгина Роббимизнинг Ўзидир. Қуръони каримда: “…Албатта, биз Аллоҳнинг ихтиёридамиз ва албатта, биз Унинг ҳузурига қайтувчилармиз…” дейилган.
Ўзбекистон мусулмонлари идораси Фарғона вилояти вакиллиги ҳамда Alhidoya.uz сайти жамоаси Қўқон шаҳар «Ҳазрати Аббос» масжиди имом-хатиби Саидкамолхон домла Маҳмудовнинг вафоти муносабати билан оила аъзолари ва яқинларига чуқур таъзия изҳор этади.
Саидкамолхон домла 2014 йилдан буён Қўқон шаҳридаги «Ҳазрати Аббос» масжиди имом-хатиби вазифасида ишлаб келаётганди. Жорий йил 21 март куни ўзи, турмуш ўртоғи ва уч нафар вояга етмаган фарзандлари билан хонадонида ис газидан заҳарланиш натижасида Ҳақнинг раҳматига қовушишди.
Аллоҳ марҳум домламиз ва унинг аҳли оиласини мағфират қилсин, савоб амаллари билан қабрларини нурга тўлдириб, жойларини жаннатда қилсин! Қолган барча яқинларига Аллоҳ сабри жамил берсин!
Жаноза намози бугун 21 март куни соат 20:30 да марҳумнинг хонадони (Қўқон шаҳар Муқимий шаҳарчаси Сангзор кўчаси)да ўқилади.
Иннаа лиллааҳи ва иннаа илайҳи рожиъуун.
