Мисрдаги ислом оламининг нуфузли илмий-диний маркази — Ал-Азҳар раҳбарияти Ўзбекистон билан илмий ва маърифий соҳадаги ҳамкорликни янада кенгайтиришга тайёрлигини билдирди. Бош имом шайх Аҳмад ат-Таййиб Ўзбекистон делегацияси билан учрашувда икки томонлама илмий лойиҳаларни йўлга қўйиш муҳимлигини таъкидлади.
Учрашувда таълим ва илм-фан соҳасидаги қатор қўшма ташаббуслар муҳокама қилинди. Жумладан, қуйидаги йўналишларда ҳамкорликни кучайтириш масалалари кўриб чиқилди:
- уламолар ва мутахассислар ўртасида тажриба алмашинув дастурларини йўлга қўйиш;
- ўзбек талабаларининг Ал-Азҳарда таълим олишини қўллаб-қувватлаш;
- қўшма илмий-тадқиқот лойиҳаларини амалга ошириш;
- конференциялар, мастер-класслар ва ўқув семинарларини ташкил этиш.
Ўзбекистон томони учрашув давомида мамлакатда диний-маърифий соҳада амалга оширилаётган ислоҳотлар, экстремизм ва радикал ғояларнинг олдини олиш юзасидан кўрилаётган чора-тадбирлар, шунингдек, ёшлар билан ишлашда маърифатнинг ўрни ҳақида маълумот берди.
Шайх Аҳмад ат-Таййиб Ўзбекистон билан ҳамкорликни тарихан муҳим алоқа сифатида баҳолаб, икки мамлакат ўртасидаги илмий ва таълимий муносабатларни янада чуқурлаштириш зарурлигини таъкидлади.
Учрашув якунида томонлар келгусида:
- қўшма илмий лойиҳаларни амалга ошириш;
- академик алмашинув дастурларини йўлга қўйиш;
- талабалар ва мутахассислар учун қўшимча грантлар ажратиш;
- маърифий тадбирларини мунтазам ўтказиш бӯйича келишиб олганини билдирди.
Тайёрлаган: Отабек Матназаров
***
Misrdagi islom olamining nufuzli ilmiy-diniy markazi — Al-Azhar rahbariyati O‘zbekiston bilan ilmiy va ma’rifiy sohadagi hamkorlikni yanada kengaytirishga tayyorligini bildirdi. Bosh imom shayx Ahmad at-Tayyib O‘zbekiston delegatsiyasi bilan uchrashuvda ikki tomonlama ilmiy loyihalarni yo‘lga qo‘yish muhimligini ta’kidladi.
Uchrashuvda ta’lim va ilm-fan sohasidagi qator qo‘shma tashabbuslar muhokama qilindi. Jumladan, quyidagi yo‘nalishlarda hamkorlikni kuchaytirish masalalari ko‘rib chiqildi:
- ulamolar va mutaxassislar o‘rtasida tajriba almashinuv dasturlarini yo‘lga qo‘yish;
- o‘zbek talabalarining Al-Azharda ta’lim olishini qo‘llab-quvvatlash;
- qo‘shma ilmiy-tadqiqot loyihalarini amalga oshirish;
- konferensiyalar, master-klasslar va o‘quv seminarlarini tashkil etish.
O‘zbekiston tomoni uchrashuv davomida mamlakatda diniy-ma’rifiy sohada amalga oshirilayotgan islohotlar, ekstremizm va radikal g‘oyalarning oldini olish yuzasidan ko‘rilayotgan chora-tadbirlar, shuningdek, yoshlar bilan ishlashda ma’rifatning o‘rni haqida ma’lumot berdi.
Shayx Ahmad at-Tayyib O‘zbekiston bilan hamkorlikni tarixan muhim aloqa sifatida baholab, ikki mamlakat o‘rtasidagi ilmiy va ta’limiy munosabatlarni yanada chuqurlashtirish zarurligini ta’kidladi.
Uchrashuv yakunida tomonlar kelgusida:
- qo‘shma ilmiy loyihalarni amalga oshirish;
- akademik almashinuv dasturlarini yo‘lga qo‘yish;
- talabalar va mutaxassislar uchun qo‘shimcha grantlar ajratish;
- ma’rifiy tadbirlarini muntazam o‘tkazish bo‘yicha kelishib olganini bildirdi.
Tayyorlagan: Otabek Matnazarov
