Муқаддас Ҳаж ибодатини адо этиш ҳар бир мусулмоннинг эзгу орзуларидан бири ҳисобланади. Бу муборак сафар инсон қалбини поклайдиган, маънавий камолотга етаклайдиган ва ҳаётида унутилмас из қолдирадиган улуғ ибодатдир.
Жорий йилда муқаддас Ҳаж амалларини адо этиш учун Саудия Арабистони Подшоҳлигига йўл олган Фарғоналик зиёратчиларнинг илк гуруҳи Ватанга қайтиб келди. Ҳожиларни Фарғона халқаро аэропортида вилоят мутасаддилари, диний соҳа вакиллари ҳамда зиёратчиларнинг яқинлари кутиб олдилар.
Кутиб олиш маросимида ҳожиларнинг муборак сафардан соғ-саломат қайтганликлари муносабати билан эзгу тилаклар билдирилди. Таъкидланганидек, давлатимиз раҳбарининг ташаббуси ва доимий эътибори туфайли юртдошларимиз учун Ҳаж зиёратини муносиб адо этиш мақсадида барча зарур шарт-шароитлар яратилмоқда.
Зиёратчилар муқаддас Макка ва Мадина шаҳарларида Ҳаж ибодатларини тўлиқ адо этиб, ислом оламининг муқаддас қадамжоларини зиёрат қилдилар. Улар сафар давомида мамлакатимиз тинчлиги, халқимиз фаровонлиги, юртимиз равнақи ва барқарорлиги учун дуолар қилганликларини алоҳида таъкидладилар.
Қайд этиш жоизки, Фарғона вилоятидан муқаддас Ҳаж сафарига борган зиёратчиларнинг кейинги гуруҳлари ҳам белгиланган жадвал асосида 13 июнга қадар Ватанга қайтиши давом этади.
***
Muqaddas Haj ibodatini ado etish har bir musulmonning ezgu orzularidan biri hisoblanadi. Bu muborak safar inson qalbini poklaydigan, maʼnaviy kamolotga yetaklaydigan va hayotida unutilmas iz qoldiradigan ulug‘ ibodatdir.
Joriy yilda muqaddas Haj amallarini ado etish uchun Saudiya Arabistoni Podshohligiga yo‘l olgan Farg‘onalik ziyoratchilarning ilk guruhi Vatanga qaytib keldi. Hojilarni Farg‘ona xalqaro aeroportida viloyat mutasaddilari, diniy soha vakillari hamda ziyoratchilarning yaqinlari kutib oldilar.
Kutib olish marosimida hojilarning muborak safardan sog‘-salomat qaytganliklari munosabati bilan ezgu tilaklar bildirildi. Taʼkidlanganidek, davlatimiz rahbarining tashabbusi va doimiy eʼtibori tufayli yurtdoshlarimiz uchun Haj ziyoratini munosib ado etish maqsadida barcha zarur shart-sharoitlar yaratilmoqda.
Ziyoratchilar muqaddas Makka va Madina shaharlarida Haj ibodatlarini to‘liq ado etib, islom olamining muqaddas qadamjolarini ziyorat qildilar. Ular safar davomida mamlakatimiz tinchligi, xalqimiz farovonligi, yurtimiz ravnaqi va barqarorligi uchun duolar qilganliklarini alohida taʼkidladilar.
Qayd etish joizki, Farg‘ona viloyatidan muqaddas Haj safariga borgan ziyoratchilarning keyingi guruhlari ham belgilangan jadval asosida 13 iyunga qadar Vatanga qaytishi davom etadi.
