Ижтимоий тармоқларда кенг тарқалган видеоклипда Патрис Баумелнинг шаҳодат калимасини айтиб, исломни қабул қилгани кўрсатилган, дея хабар беради “Siasat” портали.
Жазоир шаҳрида жойлашган “Mouloudia Club d’Alger” футбол клубининг машҳур мураббийи, франциялик Патрис Баумел Ислом динини қабул қилиб, исмини Aмир деб ўзгартирди.
Мазкур видеода бир киши Жазоир пойтахтининг ал-Ҳарраҳ туманидаги Жинан Мабрук масжидида имом ёрдамида шаҳодат, яъни иймон калимасини айтаётгани акс этган.
Видеода масжид имоми Патрис Баумелнинг исломни қабул қилиш қарорини Исроилнинг давом этаётган ҳарбий тажовузига қарамай қаршилик кўрсатишда давом этаётган ғазоликларнинг чидамлилиги ҳақидаги таассуротлари билан боғлайди. Бу уни ушбу дин ҳақида кўпроқ билишга ундади.
Жазоирнинг “Mouloudia Club d’Alger” футбол клуби Х тармоғида бундай ёзади: «Aллоҳга ҳамдлар бўлсин. Ҳақиқат динига хуш келибсиз, Aмир Буммел». Футболчилар эълонида эса бундай дейилади: “Шундай қилиб, франциялик мураббийимиз Патрис Баумел масжидда икки шаҳодат калимани айтиб, Исломни қабул қилганини эълон қилиб, ўзига Aмир исмини танлади. Бу сенга, эй Амир, онанг сени дунёга келтирган кундан бери энг яхши хабардир, – деди ва қуйидаги ояти каримани ўқиб берди: “Сизлар менга исломингизни миннат қилмангиз, балки агар (имонингизда) содиқ бўлсангиз, билингизки, Аллоҳ сизларни имонга ҳидоят қилганини миннат қилур” (Ҳужирот, 17-оят).
Жамоа яқинда маҳаллий лигада “Parado” устидан қозонилган ғалабадан сўнг “Mouloudia Club d’Alger” мухлислари “Aллоҳ буюкдир, Aмир Бумел” деб ҳайқиришди ва мураббий шукр саждаси билан жавоб қайтарди.
46 ёшли Баумел Замбия ва Кот-дъИвуар терма жамоаларига устозлик қилган ва франциялик мураббий Ерве Ренарнинг ёрдамчиси бўлган.
* * *
Ijtimoiy tarmoqlarda keng tarqalgan videoklipda Patris Baumelning shahodat kalimasini aytib, islomni qabul qilgani ko‘rsatilgan, deya xabar beradi “Siasat” portali.
Jazoir shahrida joylashgan “Mouloudia Club d’Alger” futbol klubining mashhur murabbiyi, fransiyalik Patris Baumel Islom dinini qabul qilib, ismini Amir deb o‘zgartirdi.
Mazkur videoda bir kishi Jazoir poytaxtining al-Harrah tumanidagi Jinan Mabruk masjidida imom yordamida shahodat, ya’ni iymon kalimasini aytayotgani aks etgan.
Videoda masjid imomi Patris Baumelning islomni qabul qilish qarorini Isroilning davom etayotgan harbiy tajovuziga qaramay qarshilik ko‘rsatishda davom etayotgan g‘azoliklarning chidamliligi haqidagi taassurotlari bilan bog‘laydi. Bu uni ushbu din haqida ko‘proq bilishga undadi.
Jazoirning “Mouloudia Club d’Alger” futbol klubi X tarmog‘ida bunday yozadi: «Allohga hamdlar bo‘lsin. Haqiqat diniga xush kelibsiz, Amir Bummel». Futbolchilar e’lonida esa bunday deyiladi: “Shunday qilib, fransiyalik murabbiyimiz Patris Baumel masjidda ikki shahodat kalimani aytib, Islomni qabul qilganini e’lon qilib, o‘ziga Amir ismini tanladi. Bu senga, ey Amir, onang seni dunyoga keltirgan kundan beri eng yaxshi xabardir, – dedi va quyidagi oyati karimani o‘qib berdi: “Sizlar menga islomingizni minnat qilmangiz, balki agar (imoningizda) sodiq bo‘lsangiz, bilingizki, Alloh sizlarni imonga hidoyat qilganini minnat qilur” (Hujirot, 17-oyat).
Jamoa yaqinda mahalliy ligada “Parado” ustidan qozonilgan g‘alabadan so‘ng “Mouloudia Club d’Alger” muxlislari “Alloh buyukdir, Amir Bumel” deb hayqirishdi va murabbiy shukr sajdasi bilan javob qaytardi.
46 yoshli Baumel Zambiya va Kot-d’Ivuar terma jamoalariga ustozlik qilgan va fransiyalik murabbiy Yerve Renarning yordamchisi bo‘lgan.
