2024 йил 8 февраль куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Абу Даби шаҳрида Мусулмон донишмандлар кенгашининг навбатдаги йиғилиши олдидан бўлиб ўтган аъзо уламолар ва таклиф этилган меҳмонлар иштирокидаги Мулоқот сессиясида қатнашдилар.
Йиғилишни Мусулмон донишмандлар кенгаши раиси, Миср Араб Республикаси Бош имоми, ал-Азҳар мажмуаси раҳбари Шайх Аҳмад Тоййиб жаноблари кириш сўзи билан очди. Сессия «Миллат муаммоларини олдиндан ўрганиш йўлида», деб номланди.
Мулоқотда ҳамкорлик алоқаларини ривожлантириш, мақсадларга эришиш учун муносиб ҳисса қўшиш, ташаббус ва лойиҳаларнинг фойдалилигини ошириш каби масалаларга урғу қаратилди. Шунингдек, умумбашарий қадриятлар ва умумэътироф этилган қонун-қоидаларга риоя этишни кенг тарғиб этиш масалаларига алоҳида эътибор қилинди.
Сессияда ушбу Кенгашнинг навбатдаги йиғилишида кўриб чиқиладиган масалалар, келгусидаги биргаликда амалга ошириладиган ишлар ва тадбирлар ҳақида ҳам фикр-мулоҳаза алмашилди.
