Бугун пойтахтимиздаги “Hilton” мажмуасининг анжуманлар залида “Ислом – тинчлик ва эзгулик дини” мавзуидаги халқаро конференция ўз ишини бошлади.
Халқаро ташкилотлар раҳбарлари, Ислом оламининг машҳур уламолари, муфтийлар, дин ва давлат арбоблари иштирок этаётган ушбу анжуманнинг очилиш маросимида Ўзбекистон мусулмонлари идораси раиси, Муфтий Шайх Нуриддин Холиқназар ҳазратлари барча иштирокчиларни қутлади.
Жумладан, Муфтий ҳазратлари ҳозирги кунда дунёнинг баъзи нуқталарида нотинчликлар бўлиб турган бир пайтда бу каби мулоқотларнинг ўрни нақадар катта эканлигини қайд этдилар.
Ислом — тинчлик, ҳамжиҳатлик ва омонлик динидир. Бақара сурасининг 208-оятида: “Эй, имон келтирганлар! Ёппасига тинчлик ишига киришингиз!”, дея хитоб қилинишида ҳам тинчлик ва осудаликни таъминлашда ҳамма бирдек масъуллигига ишора бор, дея таъкидладилар Шайх ҳазратлари.
Шунингдек, Муфтий ҳазратлари Пайғамбаримиз Муҳаммад Мустафо соллаллоҳу алайҳи васаллам “Соҳибус-силм” — тинчликпарвар пайғамбар эканликларини, ҳадиси шарифларда ҳам тинчлик ва омонлик — энг олий неъмат сифатида тарғиб этилишини, умуман олганда, барча саодатимиз асоси тинчлик ва ҳамжиҳатликда эканлигини баён этдилар.
Анжуманда йиғилганлар Муфтий ҳазратларининг нутқини яқиндан қўллаб-қувватладилар.
Ўзбекистон мусулмонлари идораси Матбуот хизмати
***
Bugun poytaxtimizdagi “Hilton” majmuasining anjumanlar zalida “Islom – tinchlik va ezgulik dini” mavzuidagi xalqaro konferensiya o‘z ishini boshladi.
Xalqaro tashkilotlar rahbarlari, Islom olamining mashhur ulamolari, muftiylar, din va davlat arboblari ishtirok etayotgan ushbu anjumanning ochilish marosimida O‘zbekiston musulmonlari idorasi raisi, Muftiy Shayx Nuriddin Xoliqnazar hazratlari barcha ishtirokchilarni qutladi.
Jumladan, Muftiy hazratlari hozirgi kunda dunyoning ba’zi nuqtalarida notinchliklar bo‘lib turgan bir paytda bu kabi muloqotlarning o‘rni naqadar katta ekanligini qayd etdilar.
Islom — tinchlik, hamjihatlik va omonlik dinidir. Baqara surasining 208-oyatida: “Ey, imon keltirganlar! Yoppasiga tinchlik ishiga kirishingiz!”, deya xitob qilinishida ham tinchlik va osudalikni ta’minlashda hamma birdek mas’ulligiga ishora bor, deya ta’kidladilar Shayx hazratlari.
Shuningdek, Muftiy hazratlari Payg‘ambarimiz Muhammad Mustafo sollallohu alayhi vasallam “Sohibus-silm” — tinchlikparvar payg‘ambar ekanliklarini, hadisi shariflarda ham tinchlik va omonlik — eng oliy ne’mat sifatida targ‘ib etilishini, umuman olganda, barcha saodatimiz asosi tinchlik va hamjihatlikda ekanligini bayon etdilar.
Anjumanda yig‘ilganlar Muftiy hazratlarining nutqini yaqindan qo‘llab-quvvatladilar.
