Аввал хабар берганимиздек, 2024 йил 6–8-август кунлари ёш диний соҳа ходимларига ахборот, медиа ва коммуникациялар соҳасида саводхонликни ошириш бўйича ташкил этилган I илмий-амалий семинар ташкил этилди.
Бугун, 8 август куни Ўзбекистон мусулмонлари идорасида мазкур машғулотларнинг якунига бағишланган тадбир бўлиб ўтди. Унда Диний идора раҳбар ходимлари ва ёш имом-домлалар иштирок этди.
Ўзбекистон мусулмонлари идораси раиси, муфтий Шайх Нуриддин Холиқназар ҳазратлари учрашувда ёш диний соҳа ходимларини бугунги ахборот асрида ниҳоятда долзарб бўлган ахборот, медиа ва коммуникациялар йўналишидаги уч кунлик семинарни муваффақиятли якунлаганлари ва унинг илк тингловчиси бўлганлари билан қутлаш баробарида келгусида ҳам ёш имомларни ҳар жиҳатдан қўллаб-қувватлаш ишлари давом этишини билдирдилар.
Муфтий ҳазратлари сўзлари давомида ёш соҳа ходимларига мазкур семинарда олган билим ва малакаларини амалиётда кенг қўллаш, вақтни ғанимат билиб доимо ўз устида ишлаш, шунингдек, дин таълимотини мўмин-мусулмонларга чиройли мавъиза билан етказиш, замон билан ҳамнафас бўлиш борасида насиҳат ва тавсияларини бердилар.
Ўз навбатида ёш имомлар ҳам сўз олиб дилдан суҳбат ва бугунги кунда айни муддао бўлган семинар ташкил этилгани учун миннатдорчилик билдирди. Шунингдек, мазкур дарсларда тажрибали уламолар ва малакали устозлардан соҳага оид ва ахборот технологиялари борасида керакли билимлар олишгани ва уларни амалий машғулотларда қўллаганлари ҳар томонлама манфаатли бўлганини қайд этишди.
Тадбир сўнгида Муфтий ҳазратлари ёш имомларга семинар тингловчиси сифатида муваффақиятли иштирок этгани учун сертификатларни топшириш баробарида уларнинг келгуси фаолиятига хайрли дуолар қилдилар.
***
Avval xabar berganimizdek, 2024 yil 6–8-avgust kunlari yosh diniy soha xodimlariga axborot, media va kommunikatsiyalar sohasida savodxonlikni oshirish bo‘yicha tashkil etilgan I ilmiy-amaliy seminar tashkil etildi.
Bugun, 8 avgust kuni O‘zbekiston musulmonlari idorasida mazkur mashg‘ulotlarning yakuniga bag‘ishlangan tadbir bo‘lib o‘tdi. Unda Diniy idora rahbar xodimlari va yosh imom-domlalar ishtirok etdi.
O‘zbekiston musulmonlari idorasi raisi, muftiy Shayx Nuriddin Xoliqnazar hazratlari uchrashuvda yosh diniy soha xodimlarini bugungi axborot asrida nihoyatda dolzarb bo‘lgan axborot, media va kommunikatsiyalar yo‘nalishidagi uch kunlik seminarni muvaffaqiyatli yakunlaganlari va uning ilk tinglovchisi bo‘lganlari bilan qutlash barobarida kelgusida ham yosh imomlarni har jihatdan qo‘llab-quvvatlash ishlari davom etishini bildirdilar.
Muftiy hazratlari so‘zlari davomida yosh soha xodimlariga mazkur seminarda olgan bilim va malakalarini amaliyotda keng qo‘llash, vaqtni g‘animat bilib doimo o‘z ustida ishlash, shuningdek, din ta’limotini mo‘min-musulmonlarga chiroyli mav’iza bilan yetkazish, zamon bilan hamnafas bo‘lish borasida nasihat va tavsiyalarini berdilar.
O‘z navbatida yosh imomlar ham so‘z olib dildan suhbat va bugungi kunda ayni muddao bo‘lgan seminar tashkil etilgani uchun minnatdorchilik bildirdi. Shuningdek, mazkur darslarda tajribali ulamolar va malakali ustozlardan sohaga oid va axborot texnologiyalari borasida kerakli bilimlar olishgani va ularni amaliy mashg‘ulotlarda qo‘llaganlari har tomonlama manfaatli bo‘lganini qayd etishdi.
Tadbir so‘ngida Muftiy hazratlari yosh imomlarga seminar tinglovchisi sifatida muvaffaqiyatli ishtirok etgani uchun sertifikatlarni topshirish barobarida ularning kelgusi faoliyatiga xayrli duolar qildilar.
