Шу йил, 20 сентябрь куни Қувасой шаҳридаги «Қўчқор ота» масжидида маросим бўлиб ўтди. Унда вилоят бош имом-хатиби Убайдуллоҳ домла Абдуллаев, вилоят бош имом-хатиби ўринбосари Алишер домла Наимов ҳамда нуронийлар иштирок этишди.
Маросимда Қуръон тиловат қилиниб, Аллоҳнинг байтини хайрли бўлиб битиши ва мўмин-мусулмонларга узоқ йиллар давомида хизмат қилишини сўраб дуога қўл очилди. Шундан сўнг, яхши ниятлар ила янги қад ростланаётган бинога илк ғишт қўйилди.
Масжиднинг янги биноси бир ярим минг ўринга мўжалланган бўлиб, замонавий ва миллийлик уйғунлашган лойиҳа асосида битказиш режалаштирилган. Шунингдек, таҳоратхона ва маъмурий бинолар ҳам тубдан янгиланади.
Аллоҳ таоло Ўзининг байтини мустаҳкам ва гўзал бўлиб қад кўтаришини насиб қилсин! Ушбу хайрли ишга ҳисса қўшаётган саховатли халқимизга кўплаб ажрлар ато қилсин!
