Ҳафтанинг чоршанба кунлари мамлакатимиздаги масжидларда фуқароларни қабул қилиш куни сифатида белгиланган. Шу боис, ҳар чоршанба куни барча масжидларда фуқароларни қабул қилиш ишлари йўлга қўйилган. Бу эса ижобий жиҳатдан ўз самарасини кўрсатмоқда.
Бугун, 9 октябрь куни Фарғона вилоятидаги барча масжидларда фуқаролар қабули ўтказилди. Диний-маърифий, ижтимоий-иқтисодий ва оилавий масалалардаги мурожаатлар билан фуқаролар имом домлалар ҳузурига келиб, ўз муаммоларига ечим изладилар.
Фарғона вилояти бош имом-хатиби Убайдуллоҳ домла Абдуллаев вилоят вакиллигига ташриф буюрган фуқаролар мурожаатини тинглади. Имом-хатиблар ва масжидлар фаолиятига доир қилинган мурожаатлар ўрганилиб, бу бўйича масъулларга керакли кўрсатмалар берилди. Шунингдек, оилавий, савдо-сотиқ, шерикчилик каби шаръий масалаларда қилинган мурожаатларга жавоб берилиб, моддий ёрдам юзасидан қилинган мурожаатларни ҳал этиш чоралари кўрилди.
Имом-хатиблар томонидан ўтказилаётган қабуллар сабаб соҳа ходимлари аҳолига янада яқинроқ бўлиш билан бирга уларнинг муаммо ва масалалари ижобий ҳал этилишида кўмакчи бўлишмоқда. Мурожаатчилар ҳам буни эътироф этиб, ушбу ташаббусга бош бўлган муфтий ҳазратлари ҳақларига дуо қилдилар.
Фарғона вилояти вакиллиги Матбуот хизмати
***
Haftaning chorshanba kunlari mamlakatimizdagi masjidlarda fuqarolarni qabul qilish kuni sifatida belgilangan. Shu bois, har chorshanba kuni barcha masjidlarda fuqarolarni qabul qilish ishlari yo‘lga qo‘yilgan. Bu esa ijobiy jihatdan o‘z samarasini ko‘rsatmoqda.
Bugun, 9 oktyabr kuni Farg‘ona viloyatidagi barcha masjidlarda fuqarolar qabuli o‘tkazildi. Diniy-ma’rifiy, ijtimoiy-iqtisodiy va oilaviy masalalardagi murojaatlar bilan fuqarolar imom domlalar huzuriga kelib, o‘z muammolariga yechim izladilar.
Farg‘ona viloyati bosh imom-xatibi Ubaydulloh domla Abdullayev viloyat vakilligiga tashrif buyurgan fuqarolar murojaatini tingladi. Imom-xatiblar va masjidlar faoliyatiga doir qilingan murojaatlar o‘rganilib, bu bo‘yicha mas’ullarga kerakli ko‘rsatmalar berildi. Shuningdek, oilaviy, savdo-sotiq, sherikchilik kabi shar’iy masalalarda qilingan murojaatlarga javob berilib, moddiy yordam yuzasidan qilingan murojaatlarni hal etish choralari ko‘rildi.
Imom-xatiblar tomonidan o‘tkazilayotgan qabullar sabab soha xodimlari aholiga yanada yaqinroq bo‘lish bilan birga ularning muammo va masalalari ijobiy hal etilishida ko‘makchi bo‘lishmoqda. Murojaatchilar ham buni e’tirof etib, ushbu tashabbusga bosh bo‘lgan muftiy hazratlari haqlariga duo qildilar.
Farg‘ona viloyati vakilligi Matbuot xizmati
