Фарғона вилоятида фаолият олиб бораётган диний соҳа ходимлари иштирокида “Ўзбекистонда бағрикенглик: дин ва давлат муносабатлари” мавзусида давра суҳбати бўлиб ўтди.
Тадбирда имом-хатиблар, имом-ноиблар ҳамда отинойилар иштирок этдилар. Суҳбат давомида юртимиздаги динлараро ва миллатлараро тотувлик сиёсати, шунингдек, бугунги глобал жараёнларда диний соҳа ходимларининг ўрни ва масъулияти ҳақида атрофлича фикр алмашилди.
Давра суҳбатида Ўзбекистон халқаро исломшунослик академияси профессорлари Фарҳоджон Каримов ва Бектош Бердиевлар маъруза билан чиқиш қилдилар. Улар ўз нутқида бағрикенглик ва миллатлараро тотувликни жамият барқарорлиги, давлат сиёсатининг асосий устуни сифатида таъкидлаб ўтдилар.
Янги Ўзбекистонда дин ва давлат муносабатлари бир-бирини тўлдирувчи, халқ манфаатига хизмат қилувчи тизим сифатида шаклланмоқда. Бағрикенглик – бу шунчаки шиор эмас, балки ҳар бир фуқаронинг қалбида жой олиши керак бўлган қадрият экани, таъкидланди.
Шунингдек, бугун жаҳондаги зиддиятлар, айниқса, диний ниқоб остидаги низолар барча жамиятларни огоҳ бўлишга чорламоқда. Шу нуқтаи назардан, Ўзбекистонда турли миллат ва дин вакилларининг тинч-тотув, ўзаро ҳурмат муҳитида яшаб келаётгани қайд этилди.
Тадбир давомида иштирокчилар давлат ва дин муносабатлари ҳақидаги қонунчилик асослари, диний эркинликни таъминлашга қаратилган ислоҳотлар, шунингдек, жаҳолатга қарши маърифат орқали курашишдаги янги йўналишлар ҳақида ҳам фикр алмашдилар.
Суҳбат сўнгида мамлакатимиздаги тинчлик ва тотувлик муҳитини сақлаб қолишда ҳар бир имом, ҳар бир маърифат фидоийси ўз ҳиссасини қўшиши лозимлигини таъкидлаб ўтилди.
***
Farg‘ona viloyatida faoliyat olib borayotgan diniy soha xodimlari ishtirokida “O‘zbekistonda bag‘rikenglik: din va davlat munosabatlari” mavzusida davra suhbati bo‘lib o‘tdi.
Tadbirda imom-xatiblar, imom-noiblar hamda otinoyilar ishtirok etdilar. Suhbat davomida yurtimizdagi dinlararo va millatlararo totuvlik siyosati, shuningdek, bugungi global jarayonlarda diniy soha xodimlarining o‘rni va mas’uliyati haqida atroflicha fikr almashildi.
Davra suhbatida O‘zbekiston xalqaro islomshunoslik akademiyasi professorlari Farhodjon Karimov va Bektosh Berdiyevlar ma’ruza bilan chiqish qildilar. Ular o‘z nutqida bag‘rikenglik va millatlararo totuvlikni jamiyat barqarorligi, davlat siyosatining asosiy ustuni sifatida ta’kidlab o‘tdilar.
Yangi O‘zbekistonda din va davlat munosabatlari bir-birini to‘ldiruvchi, xalq manfaatiga xizmat qiluvchi tizim sifatida shakllanmoqda. Bag‘rikenglik – bu shunchaki shior emas, balki har bir fuqaroning qalbida joy olishi kerak bo‘lgan qadriyat ekani, ta’kidlandi.
Shuningdek, bugun jahondagi ziddiyatlar, ayniqsa, diniy niqob ostidagi nizolar barcha jamiyatlarni ogoh bo‘lishga chorlamoqda. Shu nuqtayi nazardan, O‘zbekistonda turli millat va din vakillarining tinch-totuv, o‘zaro hurmat muhitida yashab kelayotgani qayd etildi.
Tadbir davomida ishtirokchilar davlat va din munosabatlari haqidagi qonunchilik asoslari, diniy erkinlikni ta’minlashga qaratilgan islohotlar, shuningdek, jaholatga qarshi ma’rifat orqali kurashishdagi yangi yo‘nalishlar haqida ham fikr almashdilar.
Suhbat so‘ngida mamlakatimizdagi tinchlik va totuvlik muhitini saqlab qolishda har bir imom, har bir ma’rifat fidoiysi o‘z hissasini qo‘shishi lozimligini ta’kidlab o‘tildi.
