Шу йил, 23 август куни вилоятда фаолият олиб бораётган отинойилар учун Фарғона Политехника Университети мажлислар залида қисқа муддатли ўқув-семинар ўтказилди. Семинар маъруза-амалиёт тарзида олиб борилди.
Семинарда «Хўжамбердибой» масжиди имом-хатиби Ҳусниддин домла Турсунзода иштирок этиб, динимиз софлигини асраш, ёшларни ёт ғоялар таъсирига тушиб қолишини олдини олиш, куфр ва ширкнинг ўртасидаги фарқ, аёллар орасида учраётган бидъат ва хурофотлар мавзусида чиқиш қилди. Бундан ташқари, Дин ишлари бўйича қўмитанинг Фарғона вилояти бўлими мутахассиси Дилоромхон Ғофурова ижтимоий кўмакка муҳтож хотин-қизлар билан ишлашнинг усуллари ва йўналишлари тўғрисида маълумот берди. Фарғона вилояти бош имом-хатибининг хотин-қизлар масалалари бўйича ёрдамчиси Ҳилолахон Комилова эса отинойилар томонидан берилган саволларига жавоб берди.
Шунингдек, ҳар бир отинойи ўз устида мунтазам равишда ишлаши, илм ва малакасини ошириб бориши, аёлларга хос фиқҳий масалалар, қирқ фарз, дин арконлари юзасидан чоп этилаётган адабиётларни мутолаа қилишлари, Ўзбекистон мусулмонлари идораси томонидан чиқарилаётган Жума тезислари билан мунтазам равишда танишиб боришлари муҳимлиги қайд этилди.