2023 йил 20 ноябрь куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Абу Дабидаги Мусулмон донишмандлар кенгаши Бош котиби Муҳаммад Абдуссалом бошчилигидаги делегацияни қабул қилдилар.
Учрашувда Муфтий ҳазратлари меҳмонларни ташриф билан қутлаш баробарида сўнгги йилларда диний-маърифий соҳадаги ислоҳотлар ҳақида маълумот бердилар. Шунингдек, Ўзбекистон мусулмонлари идораси мақсад-вазифалари, асосий фаолият йўналишлари ва келгусидаги режалари тўғрисида ҳам ўртоқлашдилар.
Муфтий ҳазратлари охирги йилларда Ўзбекистон ва Бирлашган Араб Амирликлари муносабатлари янги босқичга кўтарилиб, турли соҳаларда ҳамкорлик равнақ топаётгани, айниқса, турли тадбирлар, халқаро анжуманлар ўтказиш борасидаги алоқалар сезиларли ошаётганини алоҳида қайд этиб ўтдилар.
Бош котиб жаноблари самимий қабул учун миннатдорлик билдириш асносида Муфтий ҳазратларига Мусулмон донишмандлари кенгаши раиси, доктор Аҳмад Тоййиб жаноблари саломларини етказди.
Мулоқотда Муҳаммад Абдуссалом 10 йил муқаддам Абу Даби шаҳрида ташкил этилган мазкур кенгаш ислом дунёсидаги нуфузли ташкилотга айлангани, унинг асосий мақсади тинчликни тарғиб қилиш ва умуминсоний қадриятларни кенг ёйиш эканини изоҳлади. Меҳмон сўзида давом этиб, бугунги мураккаб даврдаги экстремизм, терроризм ва исломофобия каби таҳдидларга биргаликда курашиш муҳимлигига ҳам эътибор қаратди.
Дўстона руҳда ўтган учрашувда икки томонлама алоқаларни ривожлантириш, мўмин-мусулмонлар эҳтиёжларини таъминлаш ва ислом уммати бирдамлиги мустаҳкамлаш каби масалалар ҳам муҳокама этилди.
Маълумот ўрнида, “Мусулмон донишмандлари кенгаши” мустақил халқаро ташкилот бўлиб, у 2014 йилда Бирлашган Aраб Aмирликларининг Aбу Даби шаҳрида ташкил этилган. Кенгаш фаолияти БAA Президенти Шайх Муҳаммад бин Зоид Ол Наҳаён томонидан қўллаб-қувватланади.
Кенгашнинг асосий мақсади мусулмон оламида тинчликни тарғиб қилиш, низоларни тўхтатишда биргаликда ҳаракат қилиш ҳисобланиб, кенгаш бошқаруви аъзолигига ўзининг мустақиллиги ва мўътадиллиги билан нуфузга эришган мусулмон олимлари ва экспертлари жалб қилинган.
Ўзбекистон мусулмонлари идораси Матбуот хизмати
