Ваниҳоят кутилган финал ўйини бўлиб ўтди. “Муфтий соврини – 2025” мини-футбол мусобақаси якуний учрашувида Наманган вакиллиги ва Қорақалпоғистон мусулмонлари қозиёти жамоалари ўзаро беллашди. Иккала жамоа ҳам ушбу мусобақага жиддий тайёргарлик кўриб келишгани яққол намоён бўлди. Боиси уларнинг саралашлардан муваффақиятли ўтиб, юқори босқичгача етиб келгани ҳам бежис эмас.
Финал ўйинини таниқли футбол шарҳловчилари Мирзаҳаким Тўхтамирзаев ва Ориф Толипов шарҳлаб борди.
Мусобақа якунига кўра:
1-ўрин: Қорақалпоғистон мусулмонлари қозиёти жамоаси;
2-ўрин: Наманган вакиллиги жамоаси;
3-ўрин: Самарқанд вакиллиги жамоасига насиб этди.
Муросасиз кечган ўйинни футбол шайдолари олқишлар ила кузатиб боришди. Асосий вақтда жамоалар 4:4 ҳисобида дуранг қайд этишди. Ғолиб жамоа пеналтилар серияси орқали аниқланди. Унда Қорақалпоғистон мусулмонлари қозиёти жамоаси 4:2 ҳисобда мустлақ чемпион бўлишди.
Мусобақадан сўнг тақдирлаш маросими бўлиб ўтди. Унда Ўзбекистон мусулмонлари идораси раиси, муфтий Шайх Нуриддин Холиқназар ҳазратлари, Дин ишлари бўйича қўмита раиси Содиқжон Тошбоев, Ўзбекистон футбол ассоциацияси биринчи вице-президенти Равшан Эрматов, Ўзбекистон миллий терма жамоаси ёрдамчи мураббийи Темур Кападзе, футбол афсонаси Миржалол Қосимов ва бир гуруҳ мутасаддилар бош кубокни финал ўйини ғолиби Қорақалпоғистон жамоасига тантанали тарзда топширди. Шунингдек, ғолиб жамоа аъзоларининг ҳар бирига биринчи ўрин медали ва ноутбук тақдим этилди.
Наманган жамоасига эса иккинчи ўрин медали ва замонавий телевизор, Самарқанд жамоасига учинчи ўрин медали ва планшет топширилди. Шунингдек, ҳакамлар, “Энг яхши дарвозабон”, “Энг кўп тўпурар”, “Энг яхши ўйинчи” номинацияларига сазовор бўлган ўйинчиларга ҳам қимматбаҳо совғалар топширилди. Шунингдек, барча ўрин соҳибларига пул мукофотлари ва эсдалик совғалари ҳам тақдим этилди.
Ўзбекистон мусулмонлари идораси Матбуот хизмати
***
Vanihoyat kutilgan final oʼyini boʼlib oʼtdi. “Muftiy sovrini – 2025” mini-futbol musobaqasi yakuniy uchrashuvida Namangan vakilligi va Qoraqalpogʼiston musulmonlari qoziyoti jamoalari oʼzaro bellashdi. Ikkala jamoa ham ushbu musobaqaga jiddiy tayyorgarlik koʼrib kelishgani yaqqol namoyon boʼldi. Boisi ularning saralashlardan muvaffaqiyatli oʼtib, yuqori bosqichgacha yetib kelgani ham bejis emas.
Final oʼyinini taniqli futbol sharhlovchilari Mirzahakim Toʼxtamirzaev va Orif Tolipov sharhlab bordi.
Musobaqa yakuniga koʼra:
1-oʼrin: Qoraqalpogʼiston musulmonlari qoziyoti jamoasi;
2-oʼrin: Namangan vakilligi jamoasi;
3-oʼrin: Samarqand vakilligi jamoasiga nasib etdi.
Murosasiz kechgan oʼyinni futbol shaydolari olqishlar ila kuzatib borishdi. Аsosiy vaqtda jamoalar 4:4 hisobida durang qayd etishdi. Gʼolib jamoa penaltilar seriyasi orqali aniqlandi. Unda Qoraqalpogʼiston musulmonlari qoziyoti jamoasi 4:2 hisobda mustlaq chempion boʼlishdi.
Musobaqadan soʼng taqdirlash marosimi boʼlib oʼtdi. Unda Oʼzbekiston musulmonlari idorasi raisi, muftiy Shayx Nuriddin Xoliqnazar hazratlari, Din ishlari boʼyicha qoʼmita raisi Sodiqjon Toshboev, Oʼzbekiston futbol assotsiatsiyasi birinchi vitse-prezidenti Ravshan Ermatov, Oʼzbekiston milliy terma jamoasi yordamchi murabbiyi Temur Kapadze, futbol afsonasi Mirjalol Qosimov va bir guruh mutasaddilar bosh kubokni final oʼyini gʼolibi Qoraqalpogʼiston jamoasiga tantanali tarzda topshirdi. Shuningdek, gʼolib jamoa aʼzolarining har biriga birinchi oʼrin medali va noutbuk taqdim etildi.
Namangan jamoasiga esa ikkinchi oʼrin medali va zamonaviy televizor, Samarqand jamoasiga uchinchi oʼrin medali va planshet topshirildi. Shuningdek, hakamlar, “Eng yaxshi darvozabon”, “Eng koʼp toʼpurar”, “Eng yaxshi oʼyinchi” nominatsiyalariga sazovor boʼlgan oʼyinchilarga ham qimmatbaho sovgʼalar topshirildi. Shuningdek, barcha oʼrin sohiblariga pul mukofotlari va esdalik sovgʼalari ham taqdim etildi.
Oʼzbekiston musulmonlari idorasi Matbuot xizmati
