Бугун, 29 апрель куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Эрон Ислом Республикаси ва Украина давлатининг Ўзбекистондаги Фавқулодда ва Мухтор элчиларини қабул қилдилар.
Куннинг биринчи ярмида Муфтий ҳазратлари Эрон Ислом Республикасининг Ўзбекистондаги элчиси Муҳаммад Али Искандарий жаноблари билан мулоқот ўтказдилар.
Самимий учрашувда Муфтий ҳазратлари юртимиздаги диний-маърифий соҳадаги ўзгаришларни баён қилиш баробарида Ўзбекистон ва Эрон ўртасидаги яқин дўстлик алоқалари янада мустаҳкамланаётгани, қадимдан икки халқни ягона дин ва муштарак мақсадлар бирлаштириб туриши, сўнгги йилларда мамлакатлар ўртасидаги муносабатлар тез суръатларда ривожланиб бораётганини алоҳида таъкидладилар.
Шунингдек, мамлакатларимиз ўртасидаги дўстлик, иқтисодий ва маданий алоқалар янги босқичга кўтарилгани, илмий-маърифий, маданий ва зиёрат туризми йўналишларида ўзаро ҳамкорлик яхши самара бераётгани қайд этилди.
Муҳаммад Али Искандарий Ўзбекистон тараққиёт йўлида дадил одимлаётгани, мазкур ўзгаришларга эришишда амалга оширилаётган ислоҳотларнинг ўрни катта эканини билдирди.
Элчи жаноблари Ўзбекистон мусулмон оламида катта нуфузга эга давлат эканини эътироф этиши баробарида диний-маърифий соҳада алоқаларни ўрнатиш, қўлёзмаларни биргаликда тадқиқ этиш, турли тадбирлар ўтказиш каби йўналишларда ҳамкорлик қилиш муҳимлигини маълум қилди.
Куннинг иккинчи ярмида Шайх Нуриддин Холиқназар ҳазратлари Украинанинг Ўзбекистондаги элчиси Микола Дорошенко жанобларини қабул қилдилар.
Ўзаро мулоқотда Муфтий ҳазратлари дўстлик ва ўзаро ҳурматга асосланган Ўзбекистон ва Украина ўртасидаги дўстона алоқалар ривожланаётгани, ўтган даврда илмий-маърифий ва маданий муносабатлар равнақ топаётганини алоҳида қайд этдилар.
Элчи жаноблари Украина кўп конфессияли, турфа хил миллатли давлат эканини билдириш баробарида ушбу мамлакатдаги динлар тарихи ҳамда эътиқод қилувчиларга яратилган шарт-шароитларни баён қилди. Шунингдек, у ўзаро манфаатли алоқаларни ривожлантиришга бор куч-ғайрати, билими ва тажрибасини қаратишга тайёр эканини изҳор этди.
Элчилар самимий қабул учун миннатдорлик билдирдилар.
* * *
Bugun, 29 aprel kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari Eron Islom Respublikasi va Ukraina davlatining O‘zbekistondagi Favqulodda va Muxtor elchilarini qabul qildilar.
Kunning birinchi yarmida Muftiy hazratlari Eron Islom Respublikasining O‘zbekistondagi elchisi Muhammad Ali Iskandariy janoblari bilan muloqot o‘tkazdilar.
Samimiy uchrashuvda Muftiy hazratlari yurtimizdagi diniy-ma’rifiy sohadagi o‘zgarishlarni bayon qilish barobarida O‘zbekiston va Eron o‘rtasidagi yaqin do‘stlik aloqalari yanada mustahkamlanayotgani, qadimdan ikki xalqni yagona din va mushtarak maqsadlar birlashtirib turishi, so‘nggi yillarda mamlakatlar o‘rtasidagi munosabatlar tez sur’atlarda rivojlanib borayotganini alohida ta’kidladilar.
Shuningdek, mamlakatlarimiz o‘rtasidagi do‘stlik, iqtisodiy va madaniy aloqalar yangi bosqichga ko‘tarilgani, ilmiy-ma’rifiy, madaniy va ziyorat turizmi yo‘nalishlarida o‘zaro hamkorlik yaxshi samara berayotgani qayd etildi.
Muhammad Ali Iskandariy O‘zbekiston taraqqiyot yo‘lida dadil odimlayotgani, mazkur o‘zgarishlarga erishishda amalga oshirilayotgan islohotlarning o‘rni katta ekanini bildirdi.
Elchi janoblari O‘zbekiston musulmon olamida katta nufuzga ega davlat ekanini e’tirof etishi barobarida diniy-ma’rifiy sohada aloqalarni o‘rnatish, qo‘lyozmalarni birgalikda tadqiq etish, turli tadbirlar o‘tkazish kabi yo‘nalishlarda hamkorlik qilish muhimligini ma’lum qildi.
Kunning ikkinchi yarmida Shayx Nuriddin Xoliqnazar hazratlari Ukrainaning O‘zbekistondagi elchisi Mikola Doroshenko janoblarini qabul qildilar.
O‘zaro muloqotda Muftiy hazratlari do‘stlik va o‘zaro hurmatga asoslangan O‘zbekiston va Ukraina o‘rtasidagi do‘stona aloqalar rivojlanayotgani, o‘tgan davrda ilmiy-ma’rifiy va madaniy munosabatlar ravnaq topayotganini alohida qayd etdilar.
Elchi janoblari Ukraina ko‘p konfessiyali, turfa xil millatli davlat ekanini bildirish barobarida ushbu mamlakatdagi dinlar tarixi hamda e’tiqod qiluvchilarga yaratilgan shart-sharoitlarni bayon qildi. Shuningdek, u o‘zaro manfaatli aloqalarni rivojlantirishga bor kuch-g‘ayrati, bilimi va tajribasini qaratishga tayyor ekanini izhor etdi.
Elchilar samimiy qabul uchun minnatdorlik bildirdilar.
