Бугун, 4 март куни Бирлашган Араб Амирлигининг Мусулмон жамиятлари халқаро кенгаши Бош директори Холид Халифа ал-Каъбий бошчилигидаги делегацияни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари ва Дин ишлари бўйича қўмита раиси Содиқжон Тошбоев қабул қилди.
Шайх Нуриддин Холиқназар ҳазратлари сўнгги йилларда Ўзбекистон ва Бирлашган Араб Амирлиги ўртасидаги ҳамкорлик ривож топаётгани, айниқса, икки давлат раҳбарларининг дўстона алоқалари турли йўналишлардаги муносабатларга катта замин бўлаётгани ҳақида сўз юритдилар. Жумладан, диний-маърифий соҳада ҳам бир қатор делегациялар алмашинуви ва келишувларга эришилгани, хусусан, шу йил февраль ойида Абу Даби шаҳрида бир қатор мутасадди идоралар билан Ўзбекистон делегация самарали мулоқот ўтказганини алоҳида қайд этдилар.
Содиқжон Тошбоев давлатимиз Раҳбари томонидан юртимизда амалга оширилаётган диний-маърифий соҳадаги ислоҳотлар, виждон ва эътиқод эркинлигини таъминлаш йўлида қилинаётган ўзгаришлар ҳамда динлараро мулоқот ва миллатлараро тотувлик борасидаги янгиликларга алоҳида тўхталди. Шунингдек, ижтимоий-маънавий муҳит барқарорлигини таъминлаш, экстремизмга қарши кураш ва диний ташкилотлар фаолиятини мувофиқлаштириш йўналишидаги ишлар тўғрисида сўз юритди.
Холид Халифа ал-Каъбий самимий қабул учун миннатдорлик билдириб, кенгаш тўғрисида ва унинг фаолияти ҳақида батафсил маълумот берди. Мартабали меҳмон ушбу Кенгаш 140 дан зиёд давлатлар билан ҳамкорлик ўрнатганини маълум қилиб, унинг асосий мақсадлари маҳаллий фатволарни ишлаб чиқаришга кўмаклашиш, жамиятда диний-миллий қадриятларни қарор топтириш, бағрикенглик тамойилларини кенг ёйиш, азалий урф-одатлар ва анъаналарини ҳурмат қилиш, халқлар фаровонлиги йўлида ўзаро ҳамкорлик қилиш ҳамда ватанга муҳаббат туйғуларини шакллантириш эканини баён қилди.
Учрашувда томонлар келгусида илмий-тадқиқот, диний-маърифий ва ижтимоий-маънавий соҳаларида ҳамкорлик алоқаларини янада кенгайтириш масалаларини муҳокама қилдилар.
Ташриф давомида меҳмонларга Ўзбекистон мусулмонлари идораси ҳузуридаги Фатво маркази фаолияти билан яқиндан таништирилди.
Учрашув якунида делегация кўрсатилган илтифот ва юқори даражадаги меҳмондўстлик учун миннатдорлик изҳор қилди.
* * *
Bugun, 4 mart kuni Birlashgan Arab Amirligining Musulmon jamiyatlari xalqaro kengashi Bosh direktori Xolid Xalifa al-Ka’biy boshchiligidagi delegatsiyani O‘zbekiston musulmonlari idorasi raisi, muftiy Shayx Nuriddin Xoliqnazar hazratlari va Din ishlari bo‘yicha qo‘mita raisi Sodiqjon Toshboyev qabul qildi.
Shayx Nuriddin Xoliqnazar hazratlari so‘nggi yillarda O‘zbekiston va Birlashgan Arab Amirligi o‘rtasidagi hamkorlik rivoj topayotgani, ayniqsa, ikki davlat rahbarlarining do‘stona aloqalari turli yo‘nalishlardagi munosabatlarga katta zamin bo‘layotgani haqida so‘z yuritdilar. Jumladan, diniy-ma’rifiy sohada ham bir qator delegatsiyalar almashinuvi va kelishuvlarga erishilgani, xususan, shu yil fevral oyida Abu Dabi shahrida bir qator mutasaddi idoralar bilan O‘zbekiston delegatsiya samarali muloqot o‘tkazganini alohida qayd etdilar.
Sodiqjon Toshboyev davlatimiz Rahbari tomonidan yurtimizda amalga oshirilayotgan diniy-ma’rifiy sohadagi islohotlar, vijdon va e’tiqod erkinligini ta’minlash yo‘lida qilinayotgan o‘zgarishlar hamda dinlararo muloqot va millatlararo totuvlik borasidagi yangiliklarga alohida to‘xtaldi. Shuningdek, ijtimoiy-ma’naviy muhit barqarorligini ta’minlash, ekstremizmga qarshi kurash va diniy tashkilotlar faoliyatini muvofiqlashtirish yo‘nalishidagi ishlar to‘g‘risida so‘z yuritdi.
Xolid Xalifa al-Ka’biy samimiy qabul uchun minnatdorlik bildirib, kengash to‘g‘risida va uning faoliyati haqida batafsil ma’lumot berdi. Martabali mehmon ushbu Kengash 140 dan ziyod davlatlar bilan hamkorlik o‘rnatganini ma’lum qilib, uning asosiy maqsadlari mahalliy fatvolarni ishlab chiqarishga ko‘maklashish, jamiyatda diniy-milliy qadriyatlarni qaror toptirish, bag‘rikenglik tamoyillarini keng yoyish, azaliy urf-odatlar va an’analarini hurmat qilish, xalqlar farovonligi yo‘lida o‘zaro hamkorlik qilish hamda vatanga muhabbat tuyg‘ularini shakllantirish ekanini bayon qildi.
Uchrashuvda tomonlar kelgusida ilmiy-tadqiqot, diniy-ma’rifiy va ijtimoiy-ma’naviy sohalarida hamkorlik aloqalarini yanada kengaytirish masalalarini muhokama qildilar.
Tashrif davomida mehmonlarga O‘zbekiston musulmonlari idorasi huzuridagi Fatvo markazi faoliyati bilan yaqindan tanishtirildi.
Uchrashuv yakunida delegatsiya ko‘rsatilgan iltifot va yuqori darajadagi mehmondo‘stlik uchun minnatdorlik izhor qildi.
