Ўзбекистон мусулмонлари идораси Фарғона вилояти вакиллиги жамоаси кўп йиллар мобайнида имом-хатиб сифатида самарали фаолият юритган, Тошкент шаҳридаги «Ракат» жоме масжиди имом-хатиби Раббимқул домла Муҳаммадиевнинг вафоти муносабати билан марҳумнинг оила аъзолари ва яқинларига таъзия билдиради.
Раббимқул домла 1997 йилдан буён имом-хатиб лавозимида фаолият юритиб келган. Бу йиллар давомида Тошкент шаҳридаги “Оқ тунукали”, “Иброҳим ота”, “Имом Термизий” ҳамда “Ракат” жоме масжидларида хизмат олиб бордилар.
Айни кунларда бу йилги ҳожилар хизматига бел боғлаб, Ҳаж-2025 мавсумида гуруҳ раҳбари сифатида сафарбар этилган эдилар.
Таъкидлаш зарурки, айрим ижтимоий тармоқ юритувчилари домланинг вафотини турлича талқин қилишга уриниши ҳолатлари кузатилмоқда.
Маълумот ўрнида, 2025 йил 23 май куни Раббимқул домла Муҳаммадиев “Тошкент-Мадина” йўналишида пойтахтнинг 38-гуруҳ зиёратчилари гуруҳ раҳбари сифатида йўлга чиққан эди.
Шу куни, сафарга чиқишлари билан домла парвоз давомида уйқуга кетган ва шу ҳолатда уйғонмаган. Бемор Мадина халқаро аэропорти шифокорлари томонидан кўрилганда аҳволи ўта оғир, беҳуш, саволларга жавоб бермаган. Шундан сўнг Мадина шаҳридаги «Муовасат» клиникасига жойлаштирилган. Шифокорлар томонидан бош мия қон айланиши ўткир бузилиши, мия ўзаги структуралари ўзгаришлари, бош мия шишиши ташхиси қўйилган.
Малакали шифокорлар томонидан оғир ҳолатдаги бемор нейрохирург кўригидан сўнг бош мия шишини камайтириш мақсадида 2025 йил 24 май куни операция ўтказилди.
Шундан кейин ҳам беморнинг аҳволи оғирлигича сақланиб, 2025 йил 26 май куни эрта тонгда вафот этди.
Бугун, пешин намозидан кейин Мадинаи Мунавварадаги Масжиду Набавийда жаноза намози ўқилиши ва «Бақиъ» қабристонига дафн этилиши режалаштирилган.
Аллоҳ таоло марҳум олимни Ўз мағфиратига олсин, иймонларини саломат қилсин, солиҳ амалларини ўзларига ҳамроҳ этсин. Дин ривожи, халқ маърифати ва Ватан равнақи йўлида қилган барча хизматларини Аллоҳ қабул айласин!
Ҳақ таоло марҳум олимнинг аҳли оиласи, фарзанду аржумандлари, сафдошлари, шогирдлари ва яқинларига чиройли сабр бериб, бу мусибатларини яхшиликлар ила тўлдирсин.
Иннаа лиллааҳи ва иннаа илайҳи рожиъуун.
«Мусибат етганда «Албатта, биз Аллоҳникимиз ва албатта, биз Унга қайтувчимиз», деган сабрлиларга хушхабар беринг».
***
O‘zbekiston musulmonlari idorasi Farg‘ona viloyati vakilligi jamoasi ko‘p yillar mobaynida imom-xatib sifatida samarali faoliyat yuritgan, Toshkent shahridagi «Rakat» jome masjidi imom-xatibi Rabbimqul domla Muhammadiyevning vafoti munosabati bilan marhumning oila a’zolari va yaqinlariga ta’ziya bildiradi.
Rabbimqul domla 1997 yildan buyon imom-xatib lavozimida faoliyat yuritib kelgan. Bu yillar davomida Toshkent shahridagi “Oq tunukali”, “Ibrohim ota”, “Imom Termiziy” hamda “Rakat” jome masjidlarida xizmat olib bordilar.
Ayni kunlarda bu yilgi hojilar xizmatiga bel bog‘lab, Haj-2025 mavsumida guruh rahbari sifatida safarbar etilgan edilar.
Ta’kidlash zarurki, ayrim ijtimoiy tarmoq yurituvchilari domlaning vafotini turlicha talqin qilishga urinishi holatlari kuzatilmoqda.
Ma’lumot o‘rnida, 2025 yil 23 may kuni Rabbimqul domla Muhammadiyev “Toshkent-Madina” yo‘nalishida poytaxtning 38-guruh ziyoratchilari guruh rahbari sifatida yo‘lga chiqqan edi.
Shu kuni, safarga chiqishlari bilan domla parvoz davomida uyquga ketgan va shu holatda uyg‘onmagan. Bemor Madina xalqaro aeroporti shifokorlari tomonidan ko‘rilganda ahvoli o‘ta og‘ir, behush, savollarga javob bermagan. Shundan so‘ng Madina shahridagi «Muovasat» klinikasiga joylashtirilgan. Shifokorlar tomonidan bosh miya qon aylanishi o‘tkir buzilishi, miya o‘zagi strukturalari o‘zgarishlari, bosh miya shishishi tashxisi qo‘yilgan.
Malakali shifokorlar tomonidan og‘ir holatdagi bemor neyroxirurg ko‘rigidan so‘ng bosh miya shishini kamaytirish maqsadida 2025 yil 24 may kuni operatsiya o‘tkazildi.
Shundan keyin ham bemorning ahvoli og‘irligicha saqlanib, 2025 yil 26 may kuni erta tongda vafot etdi.
Bugun, peshin namozidan keyin Madinai Munavvaradagi Masjidu Nabaviyda janoza namozi o‘qilishi va «Baqi’» qabristoniga dafn etilishi rejalashtirilgan.
Alloh taolo marhum olimni O‘z mag‘firatiga olsin, iymonlarini salomat qilsin, solih amallarini o‘zlariga hamroh etsin. Din rivoji, xalq ma’rifati va Vatan ravnaqi yo‘lida qilgan barcha xizmatlarini Alloh qabul aylasin!
Haq taolo marhum olimning ahli oilasi, farzandu arjumandlari, safdoshlari, shogirdlari va yaqinlariga chiroyli sabr berib, bu musibatlarini yaxshiliklar ila to‘ldirsin.
Innaa lillaahi va innaa ilayhi roji’uun.
«Musibat yetganda «Albatta, biz Allohnikimiz va albatta, biz Unga qaytuvchimiz», degan sabrlilarga xushxabar bering».
