Шу йил, 10 октябрь куни Фарғона вилояти бош имом-хатиби ўринбосари Алишер домла Наимов вилоятнинг чегара ҳудудларидан ҳисобланган Фарғона туманида бўлиб, туманда фаолият олиб бораётган имом-хатиблар билан мулоқот ўтказди. Мулоқотда имом-хатиблар томонидан амалга оширилаётган ишлар таҳлил қилиниб, бажарилиши лозим бўлган ишлар хусусида келишиб олинди.
Бундан ташқари, Олтиариқ ва Қўштепа туманидаги масжидларда хизмат қилаётган имом-хатиб ва имом-ноиблари иштирокида учрашув ташкил этилди. Унда ёш имомлар фаолиятига алоҳида эътибор қаратилиб, уларнинг билим даражалари, нотиқлик маҳоратлари кўздан кечирилди. Уларга мавъиза одоблари, ватан ва дин равнақи йўлидаги хизматнинг масъулият ва шарафи юксак экани ҳақида гапирилди. Ёш имомларга йўл кўрсатиш, улар билан тажриба алмашиш мақсадида тажрибали имом-хатиблар бириктирилди.
Шунингдек, Алишер домла Наимов «Қалбичин ота» масжидида пешин намозида иштирок этиб, жамоатга тинчлик-хотиржамлик ва шукроналикнинг фазилати, кун сайин масжидлар обод бўлиб, намозхонларга қулайликларга яратилаётгани, бу эса диний-маърифий соҳада амалга оширилаётган ишларнинг намунаси экани ҳақида суҳбат қилди. Хусусан, шу йил 15-16 октябрь кунлари Тошкент ва Хива шаҳарларида “Ислом – тинчлик ва эзгулик дини” номли халқаро конференция бўлиб ўтиши,унга дунёнинг таниқли уламолари ташриф буюриши кутилаётгани, юртимиз катта анжуманга мезбонлик қилиши ҳақида тўхталиб ўтди. Суҳбат якунида хайрли дуолар қилинди.
***
Shu yil, 10 oktyabr kuni Farg‘ona viloyati bosh imom-xatibi o‘rinbosari Alisher domla Naimov viloyatning chegara hududlaridan hisoblangan Farg‘ona tumanida bo‘lib, tumanda faoliyat olib borayotgan imom-xatiblar bilan muloqot o‘tkazdi. Muloqotda imom-xatiblar tomonidan amalga oshirilayotgan ishlar tahlil qilinib, bajarilishi lozim bo‘lgan ishlar xususida kelishib olindi.
Bundan tashqari, Oltiariq va Qo‘shtepa tumanidagi masjidlarda xizmat qilayotgan imom-xatib va imom-noiblari ishtirokida uchrashuv tashkil etildi. Unda yosh imomlar faoliyatiga alohida e’tibor qaratilib, ularning bilim darajalari, notiqlik mahoratlari ko‘zdan kechirildi. Ularga mav’iza odoblari, vatan va din ravnaqi yo‘lidagi xizmatning mas’uliyat va sharafi yuksak ekani haqida gapirildi. Yosh imomlarga yo‘l ko‘rsatish, ular bilan tajriba almashish maqsadida tajribali imom-xatiblar biriktirildi.
Shuningdek, Alisher domla Naimov «Qalbichin ota» masjidida peshin namozida ishtirok etib, jamoatga tinchlik-xotirjamlik va shukronalikning fazilati, kun sayin masjidlar obod bo‘lib, namozxonlarga qulayliklarga yaratilayotgani, bu esa diniy-ma’rifiy sohada amalga oshirilayotgan ishlarning namunasi ekani haqida suhbat qildi. Xususan, shu yil 15-16 oktyabr kunlari Toshkent va Xiva shaharlarida “Islom – tinchlik va ezgulik dini” nomli xalqaro konferensiya bo‘lib o‘tishi,unga dunyoning taniqli ulamolari tashrif buyurishi kutilayotgani, yurtimiz katta anjumanga mezbonlik qilishi haqida to‘xtalib o‘tdi. Suhbat yakunida xayrli duolar qilindi.
