Наврўз байрами арафасида вилоятимизда яна бир йирик лойиҳанинг қурилишига киришилди. Марғилон шаҳрида Бурҳониддин Марғиноний туризм ва илмий тадқиқот марказининг қурилишига старт берилиб, ушбу ҳудудга “Яшил макон” лойиҳаси доирасида кўчат экиш тадбири ўтказилди.
Унда тегишли ташкилот ва бошқармалар мутасаддилари, қурувчилар, нуронийлар, жамоатчилик вакиллари, ёшлар иштирок этди.
Тадбирда вилоят ҳокими Хайрулло Бозоров сўз олиб, барчани Наврўз байрами ва муборак Рамазон ойи билан қутлади. Президентимиз ғоялари, ташаббуслари билан кўҳна Марғилон шаҳрида Бурҳониддин Марғиноний бобомиз номлари билан аталадиган илмий-амалий, туризм мажмуасининг қурилиш ишлари бошланаётганлиги, шунингдек, уйғун ҳолда яшил парк барпо этишга киришилганлиги айтиб ўтилди.
Давлатимиз раҳбарининг топшириқлари асосида мукаммал мажмуа лойиҳаси ишлаб чиқилганлиги, унда мозий ва бугунгача бўлган жараён ўз ифодаси топаётганлиги маълум қилинди.
Ушбу мажмуага бобокалонимиз Бурҳониддин Марғиноний хотираси, илмий мерослари абадийлаштириш, Фарғона тарихида илм, ижод, санъат билан шуғулланган барча ўтмиш авлодларимизни сиймоси акс этадиган хиёбонлар барпо қилиниши, замонавий ҳунармандчилик, савдо-сотиқ, туризм маркази қад ростлаши, меҳмонхоналар, йирик савдо марказлари, катта фонтанлар мажмуаси ташкил қилиниши таъкидланди. Мажмуага ташриф буюрган меҳмонлар ҳам Фарғонани тарихини кўриши, шу билан бирга туризм мажмуасида дам олиб, ҳунармандлар томонидан яратилган ижод маҳсуллари билан танишиши кераклиги қайд этилди.
Вилоят ҳокими қурилаётган иншоотлар экилаётган дарахтлар билан уйғун ҳолда бўлишини таъкидлади. Йилдан йилга «Яшил макон» дастури аҳамиятини ҳам тушуниб борилаётганлиги, боиси инсонни эҳтиёжи шу каби яшилликка ортиб бораётганлиги ўз аксини топаётганлигига эътибор қаратди.
Тадбирдан сўнг кўчат экиш ишларига киришилди. Мажмуага қарағай, оқ қайин, калифорния тераклари, павлония кўчатлари экилмоқда. Лойиҳа доирасида бир миллион тупга яқин кўчат экиш режалаштирилган. 2 мингдан зиёд манзарали дарахтлар шу жумладан, чинор, каштан, япон сапураси, элдар қарағайи, биргин арчаси ва оқ қарағай каби дарахтлар экилади.
***
Navro‘z bayrami arafasida viloyatimizda yana bir yirik loyihaning qurilishiga kirishildi. Marg‘ilon shahrida Burhoniddin Marg‘inoniy turizm va ilmiy tadqiqot markazining qurilishiga start berilib, ushbu hududga “Yashil makon” loyihasi doirasida ko‘chat ekish tadbiri o‘tkazildi.
Unda tegishli tashkilot va boshqarmalar mutasaddilari, quruvchilar, nuroniylar, jamoatchilik vakillari, yoshlar ishtirok etdi.
Tadbirda viloyat hokimi Xayrullo Bozorov so‘z olib, barchani Navro‘z bayrami va muborak Ramazon oyi bilan qutladi. Prezidentimiz g‘oyalari, tashabbuslari bilan ko‘hna Marg‘ilon shahrida Burhoniddin Marg‘inoniy bobomiz nomlari bilan ataladigan ilmiy-amaliy, turizm majmuasining qurilish ishlari boshlanayotganligi, shuningdek, uyg‘un holda yashil park barpo etishga kirishilganligi aytib o‘tildi.
Davlatimiz rahbarining topshiriqlari asosida mukammal majmua loyihasi ishlab chiqilganligi, unda moziy va bugungacha bo‘lgan jarayon o‘z ifodasi topayotganligi ma’lum qilindi.
Ushbu majmuaga bobokalonimiz Burhoniddin Marg‘inoniy xotirasi, ilmiy meroslari abadiylashtirish, Farg‘ona tarixida ilm, ijod, san’at bilan shug‘ullangan barcha o‘tmish avlodlarimizni siymosi aks etadigan xiyobonlar barpo qilinishi, zamonaviy hunarmandchilik, savdo-sotiq, turizm markazi qad rostlashi, mehmonxonalar, yirik savdo markazlari, katta fontanlar majmuasi tashkil qilinishi ta’kidlandi. Majmuaga tashrif buyurgan mehmonlar ham Farg‘onani tarixini ko‘rishi, shu bilan birga turizm majmuasida dam olib, hunarmandlar tomonidan yaratilgan ijod mahsullari bilan tanishishi kerakligi qayd etildi.
Viloyat hokimi qurilayotgan inshootlar ekilayotgan daraxtlar bilan uyg‘un holda bo‘lishini ta’kidladi. Yildan yilga «Yashil makon» dasturi ahamiyatini ham tushunib borilayotganligi, boisi insonni ehtiyoji shu kabi yashillikka ortib borayotganligi o‘z aksini topayotganligiga e’tibor qaratdi.
Tadbirdan so‘ng ko‘chat ekish ishlariga kirishildi. Majmuaga qarag‘ay, oq qayin, kaliforniya teraklari, pavloniya ko‘chatlari ekilmoqda. Loyiha doirasida bir million tupga yaqin ko‘chat ekish rejalashtirilgan. 2 mingdan ziyod manzarali daraxtlar shu jumladan, chinor, kashtan, yapon sapurasi, eldar qarag‘ayi, birgin archasi va oq qarag‘ay kabi daraxtlar ekiladi.
