Шу йил 16 март куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Афғонистон Ҳаж ва вақф ишлари вазири Мавлавий Нур Муҳаммад Сақиб бошчилигидаги делегациясини қабул қилдилар.
Мулоқотда томонлар сўнгги йилларда Ўзбекистон ва Афғонистон ўртасидаги алоқалар ривожланиб бораётгани, турли йўналишлардаги ҳамкорлик муносабатлари, яқин қўшничилик ва дўстлик алоқалари мустаҳкамланаётганини билдирдилар. Шунингдек, давлатимиз раҳбари бир неча бор дунё ҳамжамиятига Афғонистонда тинч ва осуда ҳаёт учун тақдим этган ташаббуслари ўзининг ижобий натижасини бераётганини алоҳида қайд этдилар.
Дин пешволари ўзбек ва афғон халқларини азал-азалдан муштарак мақсадлар бирлаштириб туришини ифодалаш баробарида уламолар ҳамкорлигини йўлга қўйиш, илмий-тадқиқот йўналишида алоқаларни жорий этиш юзасидан ўзаро фикр алмашдилар.
Меҳмонлар Ўзбекистон замини қадим-қадимдан илм-маърифат тараққий этган юрт экани, дунё тамаддунига ҳисса қўшган буюк мутафаккирлар етишиб чиққанини эътироф этиш баробарида айни кунларда ҳам ушбу диёрда турли соҳалар жадал равнақ топаётгани, айниқса, диний-маърифий йўналишда яхши натижаларга эришилаётганини юқори баҳолади.
Афғонистон делегацияси “Ҳазрати Имом” мажмуаси, Ислом цивилизацияси маркази ва Тошкент ислом институти ҳам бўлиб, пойтахтимиздаги “Исломобод” жоме масжидидаги таровеҳ намозида иштирок этди.
***
Shu yil 16 mart kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari Afg‘oniston Haj va vaqf ishlari vaziri Mavlaviy Nur Muhammad Saqib boshchiligidagi delegatsiyasini qabul qildilar.
Muloqotda tomonlar so‘nggi yillarda O‘zbekiston va Afg‘oniston o‘rtasidagi aloqalar rivojlanib borayotgani, turli yo‘nalishlardagi hamkorlik munosabatlari, yaqin qo‘shnichilik va do‘stlik aloqalari mustahkamlanayotganini bildirdilar. Shuningdek, davlatimiz rahbari bir necha bor dunyo hamjamiyatiga Afg‘onistonda tinch va osuda hayot uchun taqdim etgan tashabbuslari o‘zining ijobiy natijasini berayotganini alohida qayd etdilar.
Din peshvolari o‘zbek va afg‘on xalqlarini azal-azaldan mushtarak maqsadlar birlashtirib turishini ifodalash barobarida ulamolar hamkorligini yo‘lga qo‘yish, ilmiy-tadqiqot yo‘nalishida aloqalarni joriy etish yuzasidan o‘zaro fikr almashdilar.
Mehmonlar O‘zbekiston zamini qadim-qadimdan ilm-ma’rifat taraqqiy etgan yurt ekani, dunyo tamadduniga hissa qo‘shgan buyuk mutafakkirlar yetishib chiqqanini e’tirof etish barobarida ayni kunlarda ham ushbu diyorda turli sohalar jadal ravnaq topayotgani, ayniqsa, diniy-ma’rifiy yo‘nalishda yaxshi natijalarga erishilayotganini yuqori baholadi.
Afg‘oniston delegatsiyasi “Hazrati Imom” majmuasi, Islom sivilizatsiyasi markazi va Toshkent islom instituti ham bo‘lib, poytaxtimizdagi “Islomobod” jome masjididagi taroveh namozida ishtirok etdi.
