Бугун, 17 сентябрь куни Қозоғистон пойтахти Остона шаҳридаги Мустақиллик саройида Қозоғистон Республикаси Президенти Қосим-Жомарт Тоқаев раислигида навбатдаги VIII Жаҳон ва анъанавий динлар етакчилари қурултойи иш бошлади.
“Динлар мулоқоти: келажак йўлида синергия” шиори остида ўтаётган мазкур халқаро тадбирда 60 мамлакатдан юздан зиёд делегация, жумладан жаҳон динлари етакчилари, халқаро ташкилотлар раҳбарлари, сиёсатшунос ҳамда жамоат арбоблари келишган. Улар қаторида Ўзбекистон мусулмонлари идораси раисининг биринчи ўринбосари Ҳомиджон домла Ишматбеков ҳам иштирок этмоқда.
Қурултойнинг асосий мақсади – турли дин ва конфессиялар вакиллари ўртасида ўзаро мулоқот ва ҳамкорликни мустаҳкамлаш, тинчлик, тотувлик ва бағрикенглик ғояларини тараққий эттиришга қаратилган. Шунингдек, глобал муаммолар – терроризм ва экстремизмга қарши кураш, иқлим ўзгариши, таълим, саломатлик ва иқтисодий ривожланиш каби масалалар ҳам муҳокама марказида.
Қозоғистон Репсубликаси Президенти Қосим-Жўмарт Тўқаев қурултойнинг очилиш маросимида сўзга чиқиб, диний ва маданий турфа хилликка эътибор қаратиши билан мамлакатни “шарқ ва ғарб, шимол ва жанубни боғловчи кўприк” сифатида таърифлади. Унинг таъкидлашича, турли дин вакиллари ўртасидаги ҳамжиҳатлик инсониятнинг барқарор ва фаровон келажаги учун муҳим аҳамиятга эга.
Анжуман доирасида турли секциялар ва давра суҳбатлари ташкил этилган. Эртага, 18 сентябрь куни Ёш диний етакчиларнинг II форуми ҳам ўтказилиши режалаштирилган.
Ўзбекистон мусулмонлари идораси
Матбуот хизмати
***
Bugun, 17 sentyabr kuni Qozog‘iston poytaxti Ostona shahridagi Mustaqillik saroyida Qozog‘iston Respublikasi Prezidenti Qosim-Jomart Toqayev raisligida navbatdagi VIII Jahon va an’anaviy dinlar yetakchilari qurultoyi ish boshladi.
“Dinlar muloqoti: kelajak yo‘lida sinergiya” shiori ostida o‘tayotgan mazkur xalqaro tadbirda 60 mamlakatdan yuzdan ziyod delegatsiya, jumladan jahon dinlari yetakchilari, xalqaro tashkilotlar rahbarlari, siyosatshunos hamda jamoat arboblari kelishgan. Ular qatorida O‘zbekiston musulmonlari idorasi raisining birinchi o‘rinbosari Homidjon domla Ishmatbekov ham ishtirok etmoqda.
Qurultoyning asosiy maqsadi – turli din va konfessiyalar vakillari o‘rtasida o‘zaro muloqot va hamkorlikni mustahkamlash, tinchlik, totuvlik va bag‘rikenglik g‘oyalarini taraqqiy ettirishga qaratilgan. Shuningdek, global muammolar – terrorizm va ekstremizmga qarshi kurash, iqlim o‘zgarishi, ta’lim, salomatlik va iqtisodiy rivojlanish kabi masalalar ham muhokama markazida.
Qozog‘iston Repsublikasi Prezidenti Qosim-Jo‘mart To‘qayev qurultoyning ochilish marosimida so‘zga chiqib, diniy va madaniy turfa xillikka e’tibor qaratishi bilan mamlakatni “sharq va g‘arb, shimol va janubni bog‘lovchi ko‘prik” sifatida ta’rifladi. Uning ta’kidlashicha, turli din vakillari o‘rtasidagi hamjihatlik insoniyatning barqaror va farovon kelajagi uchun muhim ahamiyatga ega.
Anjuman doirasida turli seksiyalar va davra suhbatlari tashkil etilgan. Ertaga, 18 sentyabr kuni Yosh diniy yetakchilarning II forumi ham o‘tkazilishi rejalashtirilgan.
O‘zbekiston musulmonlari idorasi
Matbuot xizmati
