Айни кунларда Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Макка шаҳрида бўлиб турган Қорақалпоғистон Республикаси, Тошкент шаҳри ва водий вилоятларининг бўлғуси ҳожилариларига суҳбатни қилиб бердилар.
Муфтий ҳазратлари маъруза аввалида зиёратчиларимизга бу диёрда Ҳақ таоло ваҳий нозил қилгани, Расул алайҳиссалом, саҳобалар яшаганлари, шу боис бу ернинг ҳурматини сақлаш, шукр ва зикрни кўпайтириш, тоат-ибодат, яхшиликларда бардавом бўлиш, гуноҳ-маъсиятлардан эса бутунлай сақланиш лозимлигини баён этдилар.
Дилдан қилинган суҳбат чоғида Шайх Нуриддин Холиқназар ҳазратлари Ҳақ таоло Ўзининг ибодатига чақирган барча бандаларини яхши кўриши, Роббимиз муқаддас маконда дуога очилган қўлларни қуруқ қайтаришдан ҳаё қилиши, шу боис дуоларни кўп ва хўп қилиши кераклиги, бунда она-Ватанимиз, давлатимиз Раҳбари ва юртдошларимизни-да унутмасликни алоҳида таъкидладилар.
Шунингдек, Муфтий ҳазратлари мабрур ҳаж, яъни ҳеч қандай гуноҳ аралашмаган, қабул бўлган ҳаж қандай бўлиши, бунда тавба, ихлос, ҳалол-пок мол, эҳромнинг талабларига амал қилиш, ибодатни чиройли адо қилиш, зикру тасбеҳни кўпайтириш лозимлигига урғу қаратдилар.
Суҳбат сўнгида қалблари ёришиб, кўзлари намланган зиёратчиларимиз Муфтий ҳазратларининг барчанинг ҳажи мабрур бўлиши, юртимиз тинчлиги, халқимиз фаровонлиги, эртамиз эгалари бўлган фарзандларимизнинг бахту иқболини сўраб қилган дуоларига омин, дея қўл очдилар.
Айни кунларда Макка шаҳридаги меҳмонхоналарда уламолар, имом-хатиблар ва элликбошилар томонидан ҳаж ибодатига оид илмий-маърифий суҳбатлар ҳамда савол-жавоблар давом этмоқда.
***
Аyni kunlarda Oʼzbekiston musulmonlari idorasi raisi, muftiy Shayx Nuriddin Xoliqnazar hazratlari Makka shahrida boʼlib turgan Qoraqalpogʼiston Respublikasi, Toshkent shahri va vodiy viloyatlarining boʼlgʼusi hojilarilariga suhbatni qilib berdilar.
Muftiy hazratlari maʼruza avvalida ziyoratchilarimizga bu diyorda Haq taolo vahiy nozil qilgani, Rasul alayhissalom, sahobalar yashaganlari, shu bois bu yerning hurmatini saqlash, shukr va zikrni koʼpaytirish, toat-ibodat, yaxshiliklarda bardavom boʼlish, gunoh-maʼsiyatlardan esa butunlay saqlanish lozimligini bayon etdilar.
Dildan qilingan suhbat chogʼida Shayx Nuriddin Xoliqnazar hazratlari Haq taolo Oʼzining ibodatiga chaqirgan barcha bandalarini yaxshi koʼrishi, Robbimiz muqaddas makonda duoga ochilgan qoʼllarni quruq qaytarishdan hayo qilishi, shu bois duolarni koʼp va xoʼp qilishi kerakligi, bunda ona-Vatanimiz, davlatimiz Rahbari va yurtdoshlarimizni-da unutmaslikni alohida taʼkidladilar.
Shuningdek, Muftiy hazratlari mabrur haj, yaʼni hech qanday gunoh aralashmagan, qabul boʼlgan haj qanday boʼlishi, bunda tavba, ixlos, halol-pok mol, ehromning talablariga amal qilish, ibodatni chiroyli ado qilish, zikru tasbehni koʼpaytirish lozimligiga urgʼu qaratdilar.
Suhbat soʼngida qalblari yorishib, koʼzlari namlangan ziyoratchilarimiz Muftiy hazratlarining barchaning haji mabrur boʼlishi, yurtimiz tinchligi, xalqimiz farovonligi, ertamiz egalari boʼlgan farzandlarimizning baxtu iqbolini soʼrab qilgan duolariga omin, deya qoʼl ochdilar.
Аyni kunlarda Makka shahridagi mehmonxonalarda ulamolar, imom-xatiblar va ellikboshilar tomonidan haj ibodatiga oid ilmiy-maʼrifiy suhbatlar hamda savol-javoblar davom etmoqda.
