Ижтимоий тармоқларда “Фарғонада масжид имоми инсофсизми?” сарлавҳа остида хабар тарқалди. Ушбу хабар ва унда келтирилган важлар турли баҳс ва мунозараларга сабаб бўлмоқда. Айниқса, даъвода келтирилаётган шахснинг “имом” дея талқин қилиниши омма орасида аҳли илмларга нисбатан салбий фикрлар уйғотмоқда.
Ушбу ҳолат юзасидан Ўзбекистон мусулмонлари идорасининг Фарғона вилояти вакиллиги ўрганиш олиб борди. Унга кўра, имомлиги иддао қилинаётган шахс аслида ҳеч қандай диний маълумот ёки диний рутбага эга бўлмаган шахс экани маълум бўлди.
Демакки, ушбу шахсга нисбатан “имом” сўзини ишлатиш мутлақо нотўғри, унинг айни вақтда масжидга умуман алоқаси йўқ. Қайд этиш лозимки, масжид мулки дея даъво қилинаётган ер майдони аслида масжиднинг мулки бўлгани тўғрисида ҳам аниқ асос мавжуд эмас.
Шуни ҳам таъкидлаш зарурки, “имом”, “масжид” каби атамалар Ислом шиорлари ҳисобланади. Айниқса, турли нолойиқ ишларни “имом”, “масжид” каби ислом шиорларига боғлаш эса катта гуноҳдир.
Хулоса шуки, ОАВ ва ижтимоий тармоқ юритувчилари турли воқеа-ҳодисаларга нисбатан оммани жалб қилиш мақсадида уни дин билан боғлаб кўрсатишдан, халқ орасида обрў эътиборга эга бўлган кишиларнинг номлари ва суратларидан умуман алоқаси бўлмаган ўринларда қўлланишдан сақланишларини сўраймиз. Шунингдек, асоссиз хабар тарқатиш Ислом дини кўрсатмасига кўра, катта гуноҳ, қонунчиликда эса жавобгарликка сабаб бўлишини эслатиб ўтамиз.
Ўзбекистон мусулмонлари идораси Фарғона вилояти вакиллиги Матбуот хизмати
